کابل ټکی کام(پنجشنبه، ۳زمری، ۱۳۹۸)
نن سهار اته بجې شاوخوا د کابل ښار په شپاړلسمه امنیتي حوزه کې د معدن او پیټرولیم چارو وزارت په مامورینو چاودنه ترسره شوه، چې مرګ ژوبله یې هم واړوله.
له لومړۍ چاودنې وروسته په سیمه کې دوهمه چاودنه هغه مهال رامنځته شوه، چې کله خلک د پیښې په قربانیانو راټول شول.
طالبانو په دې دواړو بریدونو کې خپل لاس لرل رد کړل خو رسنیو دا بریدونه طالبانو ته منسوب کړل او ادعا یې وکړه چې د بریدونو پړه طالبانو په غاړه اخستې ده.
طالب ویاند ذبیح الله مجاهد لږ مخکې یو ځل بیا په یوه توضیحاتي ټویټ کې څرګنده کړې چې د معدن او پیټرولیم وزارت په کارکونکو برید د دوی کار نه دی.
مجاهد لیکلي: “په کابل کې د معدن او پټرولیم وزارت په مامورینو چاودنه د اسلامي امارت د مجاهدینو پورې اړه نلري.
په دې اړه د مزدور دښمن پروپاګند یوځل بیا ردوو.
دا ډول په غیرنظامي اهدافو بریدونه کول پخپله د دښمن د استخباراتو یا د دوی تر سیوري لاندې فتنه ګرو ډلو کار دی.”
په ورته وخت کې طالبانو د همدغو چاودنو سره همهاله د نهمې امنیتې حوزې په دسپیچري سیمه کې د بهرنیو ځواکونو په یوه قطار د موټربم برید ترسره کیدو ادعا وکړه او زیاته یې کړه چې ګڼ شمیر خارجي مامورین یې په دې برید کې وژلي دي.
