(کابل ټکی کام، ۱۳۹۸، زمری ۱۵)
امريکا او ملګري ملتونه وايي، په کشمير کې راپورته شوې مسئله له نږدې څاري او په ښکيلو غاړو يې د زغم غږ کړی دی.
وروسته له هغې چې هند د جمو کشمير د ایالت لپاره د اساسي قانون ۳۷۰ ماده چې ځينې اختيارونه ورکړل شوي و ختمه کړه، په یاده سيمه کې پوځي فعاليتونو زور اخيستی دی.
د ملګرو ملتونو د سرمنشي ویاند سټيفن ډوجيرک ويلي،د هند او پاکستان تر منځ کشمير کې پر پوله د پوځي فعاليتونو پر زياتيدو اندېښمن دي، باید ښکیل اړخونه له زغم نه کار واخلي.
همداراز د امريکا د بهرنيو چارو وزارت څخه په خپره شوې اعلاميه کې پر پوله پوخي اقدامات خطرناک بللي، پر هند او پاکستان يې د زغم غږ کړی دی.
په اعلاميه کې راغلي، چې امريکايي چارواکي په سيمه کې د پوځي اقداماتو څارنه کوي.
هند په جمو کشمير سيمه کې زرګونه اضافي سرتيري ځای پر ځای کړي او پاکستان هم ورته ډول اقدامات پيل کړي چې د یو بل پرضد د پوخي اقداماتو امکان زيات شوی دی.
