کابل ټکی کام (سه شنبه ، ۱۵ زمری ، ۱۳۹۸ل)
طالبانو ته نیږدې سرچینې وایي چې ټاکل شوې دملابرادر په مشرۍ دطالبانو یو لوړ رتبه هیئت سبا سهار وختي ازبکستان ته سفر وکړي.
دطالبانو نیږې سرچینو ددې خبر پخلی کړی او زیاته کړې یې ده چې ممکن دطالب اوامریکایي ټیم ترمنځ مذاکرات تر اختر او وروسته تر اختر هم دوام پیداکړي.
یادي سرچینې ویلي چې د ازبکستان سفر د امریکا سره د روانو مذاکراتو سره کوم تړاو نه لري، بلکې دا سفر له مخکې پلان شوی وو او د وخت را رسیدو سره سم تر سره کیږي.
د یادونې وړ ده چې تېره شپه د افغان سولې لپاره د امریکا خاص استازی زلمی خلیلزاد هم د هندوستان پر لور روان سو او تر تګ مخکې يې په یوه ټویټ کې وویل چې ددې ځل په مذاکراتو کې یې «ډیر ښه پرمختګ کړی دی»
طالبانو تر اوسه د ازبکستان د سفر په اړه رسما څه نه دي ویلي، خو ددې تر مخه د ملا برادر اخند په مشري طالبانو روسیې، چین، ایران، اندونیزیا ته سفرونه کړي دي او ټاکل شوې چې په نیژدې راتلونکې کې به نورو هیوادونو ته هم سفرونه وکړي.
د سیاسي دفتر دې سرچینې ویلي چې د ترکیې له لوري هم ملا برادر اخند او ورسره پلاوي ته یې بلنه ورکړل شوې وه او د سفر وخت هم ټاکل شوی وو خو د ځینو تخنیکي او لوجستیک مشکلاتو له امله سفر وځنډید، ګمان کیږي چې دغه سفر هم ډیر ژر تر سره شي.
باید وویل شي چې طالبان بهرنیو هیوادونو ته د سفرونو پر مهال په ډیره لوړه سطحه استقبالیږي، اندونیزیا ته د ملا برادر اخند وروستی سفر چې رسنیز شو، نوموړي د یاد هیواد د مرستیال ولسمشر ، بهرنیو چارو وزیرې او نورو جګپوړو مشرانو په شمول هلته د اسلامي او ولسي تنظیمونو د مشرانو سره هم لیدنې کړې وي.
داپه داسې حال کې ده چې تیره ونۍ پاکستاني رسنیو ددې هیواد دچارواکو له خولې خبر ورکړ چې ډیر ژربه طالبان دې هیواد ته رسمي سفر وکړي، اوټول موانع دفعه شوي، فقط دطالبانو هو یا نا ته انتظار دي.
