کابل ټکی کام (شنبه ، ۹ وږی ، ۱۳۹۸ل)
وسلوالو طالبانو وړمه شپه ناوخته دکندوز ولایت په مرکز له څو استقامتونو شدید بریدونه پیل کړل چې ډېری سیمې یې تر خپل کنټرول لاندې راوستې.
طالبانو په اووه ساعته کې ددولتي ځواکونو ډېری پوستې او قرارګاوې سقوط کړې، یوشمېر دولتي عساکر یې ووژل او نورو دوسلو په غورځولو سره دتسلیمۍ لاسونه جګ کړل.
دولت مجبور شو له امریکایي قواوو هر اړخیزه مرسته وغواړي، هماغه وو چې دناټو عمومي قومندان له خپلو سلاکارانو او سرتېرو سره دکندوز ښار ته ورسېدل او جګړه یې پیل کړه.
دامهال دکندوز ښار ټولې مخابراتي شبکې قطعه دي، اوښار دخونړۍ جګړې شاهدي ورکوي.
دولتي لوری اطمنان ورکوي چې جګړه یې په شا تمبولې خو ترڅنګ یې طالبان ملامتوي چې دولسي خلکو په کورونو کې پناه اخلي، خوطالبان وایي چې دوی دپناه لپاره نه بلکه دجګړې لپاره تللي .
له تازه نشر شویو عسکونو ښکاري چې طالبان دچوک نږدې سیموکې مقامت کوي، او دولتي ځواکونه په نښه کوي.
یوې معتبرې سرچینې کابل ټکي کام ته وویل چې طالبانو دجګړې لپاره خپل لېزري قطعات ښار ته داخل کړي، او په ستراتیژکو موقیعتونو کې ځای پر ځای کړي دي.
دیادونې ده کندوز یوله هغو ولایتونو څخه دی چې دګډ حکومت په دوره کې دوه ځله سقوط شو، او دا ولایت دطالبانو ترټولو لوی مرکز بلل کیږي.
