ځینې افغانان د تېر تاریخ تېروتنو او لاسته راوړنو دواړو ته پام نه کوي، زه نه پوهېږم چې دا زمونږ خدای مکړه ناپوهي ده او که بې پروايي؟ یا سر تمبه گي؟
نور ملتونه لومړی فکر کوي بیا عمل خو مونږ اول عمل کوو بیا وروسته فکر.
زیاتره افغانان په دې اند دي چې اوسنۍ اداره چې په سر کې يې نامتفکر غني واقع دی، د ټولو افغانانو د خوښې نظام نه دی او نه هم د افغانانو په خوښه رامنځته شوی دی، بلکې د امريکايانو د نېغ يرغل او لاسوهنې په ترڅ کې يو منځته راغلی نظام دی، له ستونزو ډک دی چې زمونږ مظلوم ولس ورسره لاس او گرېوان دی، فقر، بې روزگاري، ظلم، وحشت، بې عدالتي او داسې نور د دغه نظام ورځيني اوساعتوار کارونه دي، اما کومه نوې لوبه چې امریکا پیل کړې او غواړي چې دغه نیم ځانه ملت نور هم وځپي. دا ډېره خطر ناکه لوبه ده. دا به مونږ بیا یو د بل په گرېوان کې لاس اچولو ته برابر کړي او دوی به راته نظاره کوي او هغه داسې چې له یوې خوا يې سوله روانه کړې او له بل پلوه هڅه کوي په خلکو کې وېره خپره کړي ځکه چې ځینې مشران يې په تازه څرګندونو کې وايي چې که امریکا ووته، داخلي جګړه به پیل شي، غواړي په دې سره د خلکو ذهنونه مشوش کړي او د شیطان دنده ترسره کړي.
افغان طالب زمونږ ورور دی، زمونږ وینه ده، له شک پرته په تېرو اتلس کلونو کې ورسره ډېره ناروا او ظلم شوی، دا د دوی حق دی چې د یوه قانوني حکومت په جوړېدو کې سهیم شي او خپل حقوق تر لاسه کړي ځکه کومې قربانۍ چې دوی د خپل هیواد او دین او مظلوم ولس لپاره ورکړي، په معاصر وخت کې ساری نلري او دوی سره مقابله کول ستره جفا ده، دلته اشرف غني مهم نه دی. دلته باید ټول افغانان د نظام د بقا لپاره کار وکړي که چېرې نړیوال په رښتیا زمونږ لپاره سوله غواړي نو افغانان دې پرېږدي چې خپل برخلیک په خپله وټاکي
افغان ولس مثال د هغه کس دی چې د ملاریا په رنځ اخته وي، سره له دې چې کلوروکین ډېر تريخ دی خو محبوراً باید وخوړل شي
نو خبره مې دا کوله چې که طالب چاته کلوروکین تابلیت ښکاري هم خو باید دا ملت یې وزغمي ځکه موجوده مفسده اداره د فساد لپاره کار کوي او د رغېدا نده، ملت يې رنځور کړی، که ملت دا تابلیت ونه خوري، دا مړه تبه به يې د تل لپاره په بدن کې پاتې شي. بل بدیل يې نشته، همدا رنځور ملت او همدا يې درملنه.
