(کابل ټکی کام، ۱۳۹۸، وږی ۱۶، شنبه)
د راپورونو له مخې، د ولسي جرګې وکيلانو او د ملاتره خيل ورونو د ارګ په جامع مسجد کې د حج او اوقافو وزير مولوي عبدالحکيم منيب وهلی- ډبولی دی.
د حج او اوقافو وزارت څخه په خپره کړې اعلاميه کې راغلي، چې مولوي عبدالحکيم سره د ولسي جرګې پخواني غړي ملا تره خيل، د ولسي جرګې وکيلانو شاه وزير او حاجي خان تره خيل د دوی ورور دادالله او د کورنۍ د دوو نورو غړو له لوري توهين، تحقير او ورسره يې فزيکي شخړه کړې.
اعلاميه زياتوي، چې یادو کسانو تر دې مخکې هم مولوي عبدالحکيم ته ګواښونه کړي او هڅه يې کړې چې خپلې غير قانوني او نامشروع غوښتنې پرې ومني.
د حج او اوقافو وزارت له نوموړي وزير سره د تره خيل او د هغه د ورونو کړنه غندلې او د ارګ په مسجد کې د هغه سره فزيکي شخړه او توهین يې د نظام سپکاوی او قانون نه سرغړونه بللې زياتوي (له اشرف غني هيله کوو چې یاده پيښه جدي وڅيړي، له غير قانوني وسله ګرځوونکو سره د دولتي مقاماتو ورته ډول چلند د وزارت د کارونو خنډ ګرځي چې بايد یاد کسان د قانون منګولو ته وسپارل شي).
تر اوسه په دې اړه خپله ملاتره خيل او د ولسي جرګې یادو غړو څه نه دي ويلي.
دا هم نه ده په ډاګه شوې چې د یادو کسانو شخړه د حج او اوقافو وزير سره په کومه خبره راغلې ده.
که څه هم تر دې مخکې د ګډ حکومت مشر اشرف غني په بار بار ويلي چې په کابل او ولايتونو کې به د زورواکانو او غير قانوني وسله والو مخه ونيسي خو نوموړی نه دی بريالی شوی او آن د ارګ مسجد ته هم غير قانوني وسله ګرځوونکي ورسيږي او د ګډ حکومت یو وزير وهي، ډبوي او سپکوي يې.
