غزني: ګډو ځواکونو د دوو ملا امامانو په شمول پنځه ملکيان وژلي
(کابل ټکی کام، ۱۳۹۸، وږی ۲۰، چهارشنبه)
د غزني ولايت په ګيرو ولسوالۍ کې ګډو ځواکونو عمليات کړي چې پر مهال يې ملکي وګړو ته مالي او ځاني زيانونه اړولي دي.
دغه عمليات تيره شپه د يادې ولسوالۍ مربوط په دیسي سيمه کې ترسره شوي دي.
ځايي اوسيدونکي وايي، د ګډو ځواکونو په عملیاتو کې دوه کورونه، دوه مسجدونه ویجاړ شوي او د پلټنو پر مهال يې د خلکو قیمتي مالونه او پيسې هم له ځان سره وړي دي.
په عملياتو کې د یادې سيمې د دوو ملا امامانو په شمول پنځه تنه ملکي وګړي وژل شوي او څو تنه نور ټپيان شوي هم دي.
د غزني ولايتي چارواکي په دې اړه له معلوماتو ورکولو ډډه کوي.
څو ورځې مخکې هم بهرنيو ځواکونو د میدان وردګو په سیداباد ولسوالۍ کې د ملکي وګړو پر موټر هوايي بريد کړی و چې پر مهال يې اوووه تنه وژل شوي و.
په وروستيو کې د ګډو ځواکونو په هوايي بريدونو او چاپو کې تر ډيره ملکي خلک هدف ګرځي خو بشري ټولنې او چارواکي يې په اړه له څه ويلو ډډه کوي.
