(کابل ټکی کام، ۱۳۹۸، وږی ۲۱، پنجشنبه)
د افغانستان د بشري حقونو اداره وايي، په افغانستان کې په وروستيو کې ملکي مرګ ژوبله زیاته شوې چې په اړه سياستوال او حکومتي چارواکي چوپه خوله دي.
د بشري حقونو د ادارې مشر لعل ګل لعل وايي، د بهرنيو ځواکونو په هوايي بريدونو کې د ملکي مرګ ژوبلې زياتيدلو اندېښمن کړي دي.
د لعل په وينا، د ملکي مرګ ژوبلې پر وړاندې حکومتي چارواکي او سياستوال هم چوپه خوله دي په وينا يې د هغوی چوپتيا د اندېښنې وړ ده.
دا په داسې حال کې ده، چې د تيرې یکشنبې به ورځ د ميدان وردګو ولایت په سيداباد تنګي دره کې په هوايي بريد کې اووه ملکي وګړي ووژل شول او تر هغې مخکې په جلال اباد ښار کې د صفریو قطعې په عملياتو کې څلور وروڼه ووژل شول.
دغه راز هره ورځ د هيواد له بيلابيلو ولايتونو څخه د ګډو ځواکونو له لوري په شپنيو عملياتو کې د ملکي خلکو د وژل کيدو او ټپي کيدو راپورونه ورکول کيږي خو افغان چارواکي او سياستوال يې په اړه هيڅ غبرګون نه ښيي.
