کابل ټکی کام( پنجشنبه، ۲۸وږی، ۱۳۹۸)
د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد نن د امریکا ولسي جرګې ته د افغان سولې په اړه تیر شوی جریان بیانوي.
د رویټر خبري اژانس له قوله چې خلیلزاد به دغه معلومات نن د امریکا په کانګریس کې د یوې محرمانه استماعیه غونډې په ترڅ کې واوروي.
که څه هم ټاکل شوې وه چې خلیلزاد به په عام محضر کې د افغان سولې په اړه خبرې کوي خو د امریکا د بهرنیو چارو وزارت مخالفت وښود او په دې توافق وشو چې غونډه به د پردې تر شا ترسره کیږي.
د ولسي جرګې د بهرنۍ کمیټې مشر انګل په دې اړه ویلي: ” زما دا خوښه وه چې خلیلزاد به په عام محضر کې موږ ته معلومات راکړي خو اوس په دې هم خوشاله یم چې د جرګې غړو دغه فرصت ترلاسه کړی، ترڅو د افغان سولې په اړه سوالونه مطرح کړي”
خلیلزاد تیر ځل سنا ته په دې اړه معلومات ورکړي وو خو د رویټرز د خبر له مخې چې خلیلزاد نه غوښتل چې ولسي جرګې ته په دې اړه خبرې وکړي ځکه په وینا یې، په جرګه کې اکثره غړي له دیموکرات ګوند سره تعلق لري.
زلمی خلیلزاد په داسې حال کې د امریکا کانګریس ته حاضریږي چې ډونالډ ټرمپ له طالبانو سره د خلیلزاد په مشرۍ سر ته رسیدلي مذاکرات په ټپه ودرول.
