کابل ټکی کام (شنبه، ۳۰ وږی ، ۱۳۹۸ل)
نن یوشمېر دولتي رسنیو راپورونه ورکړل چې دلوګر محمدآغې ولسوالۍ لسګونه مکاتب دطالبانو له لوري تړل شوي، اوماشومانو ته ښوونځیو ته دتګ راتګ اجازه نه ورکول کیږي.
دیاد اقدام لامل دمحمدآغې ولسوالۍ په ځینې سیمو کې ددولت لخوا د وروستیو دولتي پوستو اوبیسونو جوړول یاد کړل سوي وو.
طالبانو د رسنیو په دې راپور کلک غبرګون ښودلی، طالب ویاند ذبیح الله مجاهد په خپل ټویټر لیکلي《 د لوګر ولایت په محمداغه ولسوالۍ کې د ښونځیو تړل اسلامي امارت پورې اړه نه لري》.
مجاهد زیاته کړې《دا ګام د سیمې د خلکو لخوا د کابل ادارې په وړاندې اخیستل شوی چې د خلکو په شخصي کورونو کې يې پوستې جوړې کړي او د خلکو ژوند يې په تنګ کړی دی》.
طالب ویاند په خپله اعلامیه کې زیاته کړې، رسنۍ کولای شي سیمې ته ولاړې او حقائق معلوم کړي.
