(کابل ټکی کام، ۱۳۹۸، تله ۴، پنجشنبه)
د افغانستان لپاره د ملګرو ملتونو ځانګړي استازي تادامچي یاماماتو له طالبانو غوښتي چې پر ټاکنيزو مرکزونو ه بريدونو او په انتخاباتو کې له لاسوهنې ډډه وکړي.
په افغانستان کې د ملګرو ملتونو د مرستندوی “يوناما“ دفتر څخه په خپره کړې خبرپاڼه کې راغلي، چې يامامو د تيرې سې شنبې په ورځ په قطر کې له طالبانو یاده غوښتنه کړې وه.
نوموړي ويلي، پر رايه ورکوونکو او ټاکنيزو مرکزونو بريدونه د قانون خلاف دي او ښايي جنګي جرم وبلل شي.
دا په داسې حال کې چې طالبانو تر دې مخکې په خپلو اعلاميو کې راتلونکې ولسمشريزې ټاکنې نا مشروع او د بهرنیو کړيو پروسه بللې چې په وينا يې په دې سره غواړي د افغانستان اشغال ته د دوام زمینه برابره کړي.
طالبانو له خلکو غوښتي چې له ټاکنيزو کمپايني غونډو او انتخاباتي مرکزونو ليرې و اوسي او د تعليمي ادارو له مسؤولینو يې هم پر یاده پروسه کې د نه ګډون غوښتنه کړې.
دا چې د افغانستان شاوخوا پنځوس سلنه خاوره د طالبانو تر واک لاندې ده او پر پاتې سيمو کې هم نا امني، پر ټاکنو د خلکو بې باوري او درغلي هغه څه دي چې ښايي ډيری افغانان پکې برخه وانخلي.
