کابل ټکی کام( پنجشنبه، ۴تله، ۱۳۹۸)
سبا نه بله ورځ د میزانې په شپږمه په افغانستان کې انتخابات ترسره کیدونکي دي چې د تیرو ځلونو په پرتله به دا وار زیات خونړي ثابت شي.
طالبانو د دې انتخاباتو سره په جدي ډول حساسیت ښودلی او د سختو بریدونو خبرداری یې ورکړی دی.
د طالبانو د نظامي کمیسون لخوا نن سهار یو ځل بیا یوه اعلامیه خپره شوې چې له افغانانو پکې غوښتل شوي وو چې په ټاکنو کې دې ګډون نه کوي.
طالبان وایي، د رایې اچونې دفترونه د دوی نظامي اهداف دي او بریدونه به ورباندې وکړي.
اوس تازه د طالبانو د ملکي تلفاتو د مخنیوي او سمع شکایاتو کمیسون هم په دې اړوند یوه اعلامیه خپره کړې او پکې ویلي یې دي چې خلک دې سبا او بل سبا له هر ډول تګ او راتګ څخه ډډه وکړي.
“د لویولارو ټولو مسافر وړونکو نماینده ګیو او له ولسوالیو څخه ښارونوته دوسائطو خاوندانوته خبر ورکول کیږي چې په دغه دوو ورځوکې سبا د جمعې او بله ورځ د شنبې (د مریضانو له انتقال څخه پرته)له هرنوع تګ او راتګ څخه په کلکه ډډه وکړي، ترڅو ملکي هیوادوالوته مرګ ژوبله ونه رسیږي، د مریضانو په صورت کې دې مجاهدین د ملکي خلکو پوره خیال وساتي.”
د سیاسي شنونکو په اند چې د دې انتخاباتو پایلې به د تیر ځل انتخاباتو په پرتله زیاتې نهیلي کوونکي او خرابې وي.
دا ځل د هیواد زیات شمیر مخورو سیاسي څېرو هم له انتخاباتو څخه پرېکون اعلان کړی او سولې ته یې په انتخاباتو اولیت ورکړی دی.
