ډاکټر یوسف اکبري
دوی د کندز په مدرسه کې د وژل شویو سلګونو حافظانو شهادت هېر کړ، هغه چې تا یې عام او تام مسئولیت منلی ؤ.
دوی د وردګو په روغتون ستا د زړورو قواوو عملیات هم هېر کړل، هغه چې هلته یې په روغتون کې په بستر پراته ناروغان او یوازېنی ډاکټر له دې نړۍ څخه رخصت کړ.
د همدې ولایت د جلګې په کلي کې بمبارد شوې مدرسې او د معصومو دیني طالب علمانو په وینو سرې سیپارې خو يې اصلاً په یاد هم نه دي.
د پکتیکا د محصلینو او استاذانو لپاره خو مو یو پلاوي ته د څېړنو امر کړی وو، د دوی لپاره همدا بسنه کوي.
د ننګرهار په بهسودو، خوږیاڼیو، حصارک او په وروستیو کې د څلورو وروڼو د وژنو لپاره خو مو یو واکمن پلاوی ټاکلی چې پېښې له نږدې وڅاري. مګر دا چې د پلاوي څېړنيزې پايلې معلومې نشوې، په دې نو هغه خلک کار نه لري چې تا ته يې نن رائيه درکړه.
په لوګر کې له سعودي عربستان څخه د راغلیو تره او وراره داعش ډوله وژل یې لا د حافظې په کنج کې هم نشته.
بابا خبره رانه اوږده شوه، دوی د موسی کلا د تېرې اونۍ هغه پېښه هېره کړه چې خارجي دوستانو د یوه کور څوارلس دواعش؟؟ چې لاسونه او پښې یې په وینو سرې وې خو دوی ویل چې نکریزې یې پورې کړي، چې دا نو محض درواغ دي.
حقیقت دادی چې مونږ د وزیرو په تنګي کې دواعش وژلي نه مزدوران د دوستانو ورځپانې لکه نیو یارک ټایمز، او نورې هغه دې ګرده ورځ نارې وهي چې دوی مزدوران وو.
د ارګ بدلمني، د ډېورنډ کرښه، فقر، بې روزګاري، د توکیو اسمان څکې بیې، د جګړې ژبغړانده لمبې، د عیسویت ترویج، په ولس کې د قدرت پر سر توکمیز بیلتون، اداري فساد، دا او دېته په ورته خبرو خو یوازې د نړۍ دویم لمبر موپکر پوهېږي، دوی په څه خبر دي نو …
ته به یې وګورې چې سبا به له خپلو پنډغالو را ووځي او د خپلو سرونو په قیمت خپل راعي ته رأیه ورکړي چې په دې ډول به نو ته د پنځو نورو کلونو لپاره د دوی باچا یې، همدلته ده چې ناتمام فصلونه به بشپړ شي.
خو دا یوه خبره به څنګه شي؟ هلته څوک شته چې زمونږ د ناتمام فصلونو د بشپړولو په لیار کې خنډ دي او زمونږ له ټامیانو پرته یې ټوله نړۍ د پولادي عزم په لرلو اعتراف کوي، چې ښايي زمونږ خوبونه په اوبو لاهو کړي!!
نو ولسمشره!
د دې ولس ازادي غوښتونکو زلميو ته د هغو ښځډوله ځوانانو په نظر مه ګوره، کومو چې نن له پورتنيو وحشتونو سره سره خپله رائيه درکړه، بلکې دوی هغه ځوانان دي چې امریکا يې په نړيواله سطحه خبرو اترو او د سولې مذاکراتو ته اړوېسته، او د امريکا هغه نولس کاله مخکېنی غرور يې ورته له خاورو سره برابر کړ. نو که خدای ج کول، ستا دا ټول ناتمام د خباثت فصلونه به داسې ناتمام له ځانه سره اروپا او يا هم امريکا ته وړې لکه څنګه چې ستا سکني نيکه امان الله خان له ځان سره تقريباً يوه پېړۍ مخکې له ځان سره وړي وو.
