غورځنګ
امريکا چې يو وخت يې چا پر خلاف د خبرو کولو جرأت هم نه درلودلو، د نړۍ ټولو هېوادونو به يې له مخالفت څخه ځان ساته، د طالبانو پر خلاف يې د ټولې نړۍ هېوادونو ته خصوصاً اسلامي هېوادونو ته سره کرښه ښکلې وه، چې يا خو به طالبان ياست او يا به هم له امريکا سره ودرېږئ!
کله به چې هم امريکا ملګرو ملتونو ته کومه مسوده وړاندې کړه، که دغه مسوده به د چا په تاوان وه او يا د چا په ګټه، که به څوک پرې خفه يا خوشحاله، خو د هر چا لخوا به منل کېدله، او هر چا به د امريکا له وېرې د امریکا هره ناروا منله او په سر سترګو به يې قبلوله، خو هغه پښتو متل دی چې د زور ياري تر اخره نه کېږي، نو اوس هم د امریکا حالت داسې دی چې د يوه هېواد هم سترګه ورڅخه نه سوځي.
ښه مثال يې دا دی چې يو وخت به د پاکستان مشرانو د امريکا هر امر منلو او د امريکا په خلاف به يې د يوې خبرې د کولو جرأت هم نه درلودلو، خو اوس چې څه موده مخکې عمران خان نيويارک ته يو کنفرانس ته تللی وو، نو داسې زړه بوږنوونکې ويناوې يې وکړې چې خلک ورته حيران شول چې په نيويارک ناست او د امریکا د جمهور رئيس ټرمپ په مقابل کې دومره په جرأت غږېږي.
بله بېلګه يې ترکيه ده چې اصلاً پکې سيکولرېزم نظام لا تر اوسه هم حاکم دی، خو دا دی په اوس وخت کې چې امريکايي ځواکونه له سوريې خپل پوځونه باسي، نو ترکيې د هغو کردانو په خلاف عمليات پيل کړل کوم چې امريکايانو دا دومره موده د ترکانو او سوريايانو په خلاف په خپله غېږه کې نيولي وو او په دواړو هېوادونو کې به يې نا امنۍ ته لمن وهله.
مګر دا دی اوس امريکا دغه کُردان يوازې پرېښودل او خپل ځواکونه يې د دوی له مرستې څخه ووېستل، مګر ترکيې اوس د امريکا په خلاف باندې دومره جرأت موندلی دی چې په د دوی له وتلو سره سم يې د کُردانو په خلاف عمليات پيل کړل او کردان ځپي.
امريکايان که تُرکانو ته هر څومره اخطارونه ورکړي نو ترکان چندان باک نه پرې لري، ځکه چې اوس د امريکا هغه پخوانی زور او ځواک له منځه تللی دی، له اقتصادي رکُودر سره مخ ده، په خپل منځ کې يې په دولتي کچه مخالفتونه زيات شوي دي، وخت پر وخت يې د لوړو پوسټونو لوی لوی چارواکي استعفاء ګانې ورکوي. او همداشان پکې تقريباً هره هفته وسلوال بريدونه تر سره کېږي او په لسګونو کسان پکې وژل کېږي.
نو ويلای شو چې امريکا له زورواکۍ څخه لوېدلې ده او اوس يې په نړۍ کې د خونخوارو، د بشر ضدو جناياتو د مور، د قاچاقي توکو د مرکز او نور ډول ډول بد نومونه خپل کړي دي، او ټولې نړۍ ته يې هغه پخوانۍ مرموزه څېره په ډاګه شوه.
او لکه څنګه يې چې د سوريې او ترکيې له سرحدي سيمو څخه خپل ځواکونه ووېستل او همداشان له عراق څخه هم د خپلو پوځيانو د وېستلو پلان لري نو يوه ورځ به داسې هم راشي چې له افغانستان څخه په ناڅاپي ډول ووځي او افغانستان د دوی له قدمونو څخه ازادي ومومي.
ان شاء الله
