کابل ټکی کام( شنبه، ۲۰تله، ۱۳۹۸)
روسیه په راتلونکې اونۍ کې د افغان سولې په اړه یوه څلور اړخیزه غونډه جوړوي.
په دې غونډه کې به د پاکستان، چین، امریکا او کوربه هیواد استازي ګډون کوي او د غونډې اجنډا به د افغانستان مسئله وي.
د افغانستان لپاره د روسیې ځانګړي استازي ضمیر کابلوف ویلي چې د دې غونډې موضوع به د افغانستان ملي روغه جوړه وي.
روسیه په داسې حال کې دغه غونډه جوړوي چې د امریکا او طالبانو ترمنځ د سولې په اړه روان مذاکرات څو اونۍ وړاندې د ډونالډ ټرمپ لخوا ودریدل.
په همدې حال کې طالب استازو د سیمې هیوادونو، چین ایران، روس او پاکستان ته سفرونه وکړل او د سولې په اړه یې خبرې اترې ورسره وکړې.
باید وویل شي چې د سیمې هیوادونه ټول په دې باور دي چې د افغانستان مسئله د خبرو له لارې حل کیدای شي او همدا رنګه د طالبانو د دریځ ملاتړ هم کوي.
