ډاکټر یوسف اکبري
څه ښه وایي چې دروغګو حافظه ندارد، څوک چې دروغجن وي او برسېره پر هغې په خوله یې يو څه او په زړه یې بل څه وي، نو آخر هم رسوا کیږي، او ډیر زر په خلکو کې خپل باور له لاسه ورکوي، چې بالآخره پایله یې له رسوا ناکامۍ پرته بل څه نه وي.
که تاریخ ته لرې لاړ نشو او دې نږدې وخت کې تېر شویو درواغجنو سیاسیونو ته نظر واچوو نو ثابتوي چې عملاً همداسې شوي، د خلقیانو او پرچمیانو درواغجنو ادعاوو په تېره بیا د ډاکټر نجیب له درواغو ډک او دوه مخي سیاست نجیب تر شرمېدلي داره ورساوه، همدا راز ورپسې د مجاهدینو رهبرانو چې د یو سوچه اسلامي حکومت د قیام لپاره یې خلکو او ملت ته وعدې ورکړې وې خو عملاً ثابته شوه چې دوی یوازې د قدرت وږي او تږي وو، ومو لیدل چې څنګه پوپناه شول.
خو کله چې طالبان راغلل او د دروغو د سياست پر ځای يا هم د ولس د غولوونکو ويناوو پر ځای يې ولس ته رښتينی امن او سوله راوستله او هېواد ته يې څه چې په اقوالو کې ويل هماغه يې په عمل کې هم کول.
ځکه ملت په خپله غېږ کې ځای ورکړ او تر ننه یې ټینګ په پټه او ځینو ځایونو کې په څرګنده ملاتړ او ننګه کوي.
او همدا لامل دی چې طالبان د امریکا تر بریدونو وروسته ورک نه بلکې لا غښتلي شول او ورځ تر بلې پیاوړي کیږي، یواځینی لامل یې همدا دی چې دوی دوه مخي نه دي بس چې څه وايي هغه عملي کوي هم.
اوس چې دا ننني سیاستمداران په تېره بیا حاکم خلک ګورو نو نن یو څه سبا بل څه او په عمل کې بیا نور څه کوي، همدا لامل دی چې ورځ تر بلې یې پښې ښويیږي او د اقتدار برجونه یې مخ په شړېدا دي.
دا داسې تور مخي دوه مخي منافق سیاسیون دي چې د منافقت په چل هم نه پوهیږي، په یو وخت کې ضد او نقیض څرګندونې کوي، چې له کبله یې نور هم په ملت کې او هم نړیوالې ټولنې ته خپل باور په پوره ډول له لاسه ورکړی.
کله وایي چې طالبان ولې له امریکا سره خبرې کوي او باید له دوی سره خبرې وکړي ځکه د طالبانو جګړه له امریکا سره نه بلکې له دوی سره ده، خو په عین وخت کې بیا په ډېر وقاحت سره وایي چې دا جګړه اصلاً افغاني جګړه نه ده ، دا زمونږ جګړه نه ده بلکې دا د پردیو جګړه ده، دا د روس او امریکا د همغې پخوانۍ جګړې تسلسل دی. او دا د نورو هیوادونو استخباراتي جګړه ده.
نو له دې جنابانو پوښتنه کوو، چې دا ضد او نقیض څرګندونې د څه لپاره؟ که دا جګړه پردۍ او د امریکا او روس جګړه وي نو بیا ولې له تاسې غلامانو سره خبرې وشي؟ او که ستاسې جګړه وي نو بیا ولې وایاست چې دا پردۍ جګړه ده؟!
رښتیا هم چې دروغګوی حافظه ندارد!
