کابل ټکی کام (پنجشنبه، ۲۵ تله ، ۱۳۹۸ل)
کابل کې د ملګرو ملتونو سیاسي استازولۍ یا یوناما د ړندو بمبارو په ترڅ کې د وروستیو ملکي تلفاتو په اړه خپاره کړي راپور کې ویلي چې په دې هېواد کې د ملکي وګړو د تلفاتو شمېر تر ټولو لوړې کچې ته رسېدلی دی.
یادې استازولۍ په خپل خپاره کړي راپور کې د ملکي تلفاتو د کچې پر لوړېدو اندېښنه ښودلې او زیاته کړې یې ده چې ښکېلې غاړې باید د ملکیانو ژوند ته جدي پاملرنه وکړي.
د دې راپور پر بنسټ، د روان ۲۰۱۹ میلادي کال په لومړیو ۹ میاشتو کې ۸۲۳۹ کسانو ته مرګ ژوبله اوښتې ده چې له ډلې یې ۲۵۶۳ کسان مړه او ۵۶۷۶ تنه نور ټپیان شوي دي.
یوناما زیاته کړې، دوی په افغانستان کې د جګړې پر ښکېلو غاړو غږ کوي چې د ملکي وګړو د ژوند خوندیتابه ته پوره پوره پاملرنه وکړي.
داپه داسې حال کې ده چې تېره او وړمه ورځ هم په وردګو او بدخشان ولایتو کې ګډو ځواکونو ولسي وګړي په نښه کړي وو چې له امله یې درانده تلفات رامنځته شوي و.
