کابل ټکى کام (دوشنبه ، ٢٩ تله ، ١٣٩٨ل)
د هند پوځ ويلي، چې د پاکستان تر کنترول لاندې کشمیر کې یې د وسله والو ډلو په درې مرکزونو هوایي بریدونه کړي چې لس پاکستاني پوځیان وژلي دي.
د هند د دفاع وزارت په وينا، چې پاکستاني ځواکونو په يادو مرکزونو کې د هند په خلاف وسلوالو ته روزنه ورکوله.
دا ادعا داسې مهال کيږي، چې تر دې وړاندې پاکستاني چارواکو ادعا کړې وه چې د هندي ځواکونو په برید کې پنځه پاکستاني اولسي وګړي وژل شوي دي.
خو د پاکستان د پوځ د عامه اړیکو د څانګې (آی ایس پی آر) وياند تورن جنرال اصف غفور د هندي پوځ د مشر دا ادعا مايوسونکې ګڼلې چې په آزاد کشمیر کې يې د وسلوالو کمپونو باندې بمبار کړى.
اصف غفور همدا راز ادعا کړې چې د پاکستان پوځ د هندي ځواکونو د بريد په ځواب کې د هند پوستې په نښه کړي چې په پایله کې یې نهه هندي عسکر وژل شوي او نهه نور ټپیان دي.
