کابل ټکى کام (شنبه ، ٤ لړم ، ١٣٩٨ل)
پاکستاني پوځ دعوه کړې ده چې روان ۲۰۱۹م کال د فبرورۍ میاشتې (۲۷)مې نیټې راهیسې یې د کشمیر پر سر شخړه کې یې ګڼ هندي پوځيان وژلي او ژوبل کړي دي.
د پاکستاني پوځ ویاند جنرال اصف غفور د شنبې په ورځ په خپله ټوئټر پاڼه لیکلي:” دروان کال د فبرورۍ له ۲۷ مې نيټې راهیسې پاکستان دهندي پوځ ګڼ شمېر پوستې له منځه وړي، د هغوی د توپونو ترتیب یې هم خراب کړی، چې له امله يې د توپو موقعيت بدلولو ته مجبور شوي دي.
د روان کال د فبروري په ۲۶ مه نيټه هندي چارواکو دعوه کړې وه، چې جنګي الوتکو يې د پاکستان بالاکوټ سیمه کې د وسلوالو یو پټنځای په نښه کړی او په سلګونو وسلوال یې وژلي.
خو پاکستان د هند دغه دعوه په کلکه رد کړې وه او ویلي یې و چې هندي الوتکو بالاکوټ کې په یو ځنګل بمونه غورځولي او تښتېدلي دي او هيڅ ډول ځاني زیان نه لري.
د همدې فبرورۍ میاشتې په ۲۷مه نيټه پاکستاني پوځ دعوه وکړه چې د هند دوه الوتکې یې رانسکورې کړي او د “ابهي نندن” په نامه هندي پیلوټ یې هم نیولی، چې وروسته يې بيا د خواخوږۍ پر بنسټ هند ته وسپاره.
جنرال اصف غفور لیکلي و چې د پاکستان هوایي ځواکونو د هندوستان دو جنګي الوتکی رانسکورې کړي او دوه نورې یې هندي ځواکونو پخپله د وارخطايي له امله ویشتلي دي.
د يادونې وړ ده چې د پاکستان او هند اړېکې له ډېر پخوا راهیسې کړکيچنې دي؛ خو په پنځم اګست دهند لخوا ترخپل واک لاندې کشمیر د نیمه خپلواکۍ ختمولو د د واړو ګاوندیو هیوادونو اړېکې نورې هم خرابې کړي دي.
