(کابل ټکی کام، ۱۳۹۸ لړم ۷، سه شنبه)
د جوزجان سیمه ييزې سرچينې وايي، چې د دغه ولايت په آقچې ولسوالۍ کې پر دفاعي پوستو او یوه پوځي مرکز طالبانو بريدونه کړي چې پوليسو ته يې مرګ ژوبله اړولې ده.
طالب وياند ذبیح الله مجاهد هم پر ياده ولسوالۍ کې پر يوه پوځي مرکز د برید خبر ورکړی او په خپله رسمي ټويټرپاڼه ليکي، چې تيره شپه طالبانو یادې ولسوالۍ ته نږدې د بالاحصار په نوم یو پوځي مرکز نيولی دی.
د ښاغلي مجاهد په وينا، په بيګانۍ جګړه کې اووه ويشت عسکر وژل شوي او پنځه تنه نور طالبانو ژوندي نيولي دي.
خبر زياتوي، چې د جګړې په پايله کې نهه ويشت ميله وسلې، په زياته اندازه مهمات، دوه ټانګونه او یو ټراکټور موټر طالبانو ته لاس ته ورغلي او اووه ټانګونه ویجاړ شوي دي.
مجاهد په دغه جګړه کې د دوو طالبانو د وژل کيدو خبر هم ورکړی دی.
تر اوسه په ياد بريد د اوښتو تلفاتو په اړه د جوزجان چارواکو څه نه دي ويلي خو د آقچې ولسوالۍ یوه چارواکي د نوم نه ښودلو په شرط رسنيو ته ويلي، که بيړنۍ مرسته ور ونه رسيږي ښايي دغه ولسوالۍ سقوط وکړي.
