انجنیر عمیر ویاړ
لوبه ټوله ویښو افغانانو ته جوته ده، دا چې په ټاکنو کې د ګوتو په شمیر ویده افغانانو ګډون وکړ او په اړندو سترګو یې نوماندانو ته رایې ورکړې دا بیله خبره ده، ځکه په هره ټولنه کې هر ډول خلک موجود وي لکه پښتو متل چې وایي چې په ځنګل کې هر ډول ژوي ژوند کوي، همدا راز په هره ټولنه کې ویښ او هوښیا او ویده له عقله خلاص خلک هم موجود وي، او ښکیلاکګرانو تل د ویده او بې عقله خلکو نه په استفادې سره په ټولنو کې کار کوي څو ټولنې د خپلو ګټو په محور وڅرخوي.
زمونږ په هیواد کې یې لوبه ګرمه کړه چې هلۍ د ټاکنو وخت دی ټاکنې باید وشي، د ټاکنو د څارنې لپاره یې هم کسان وټاکل، او د بای میترک سیستمونه یې ورته وپیرل، او آن د درملوک په نوم کمپنۍ ته یې په ظاهر د دې سیستم د کنټرول او ساتنې قرارداد ورکړ، په ملیونونو ډالر یې د دې ټاکنو د لګښتونو لپاره برابر او مصرف کړل، ویښ او هوښیار او له حالاتو خبر افغانان چې شمیر یې نږدې 30 ملیونو ته رسیږي آرام په کور کیناستل او د رایې ورکولو ته یې هیڅ ډول اعتناء ځکه ونکړه چې پوهیدل دا په ظاهره ټاکنې دي خو په اصل کې د سیف الملوک لوبه ده چې پر افغانانو یې ترسره کوي، او څوک چې له حالاتو خبر نه و او یا ویده و او یا د سیف الملوک ډالرو خمار کړی و او یا هم له عقله خلاص خلک و چې شمیر یې نږدې 3 ملینونو ته رسیده رایو ته ولاړل او خپلې رایې یې وکارولې خو اوس ټول ګوري او ویني چې لوبه د چا په لاس کې ده او کومې خواته روانه ده، د نړۍ په ټولو هیوادونو کې د رایو لومړنۍ پایلې عین د ټاکنو په ورځ اعلانیږي، او وروستۍ پایلې دوه یا درې ورځې وروسته حتما اعلانیږي، خو سره له دې چې افغانستان ته د سیف الملوک تر قوماندې لاندې څلویښت هیوادونه راغلي او ټول د دې حکومت سره په هر څه کې مرسته او همکاري هم کوي خو د پایلو یې لومړی په دوه او درې اونیو کې څرک نه لږیږي او بهانې مانې یې دا وي چې ګوندې کارونه له ندی بشپړ شوي او امریکا د دې لپاره چې دا له عقل نه خلاص او ویده خلک نور هم په خمار خوب ویده کړی وایی، له تیزې نه شفافیت مهم دی، حال دا چې سیف الملوک د درغلۍ لپاره کار شپه او ورځ کار کوي، او هڅه کوي چې کوم یو غلام به ورته ډیر وفادار چې د همغه لپاره لاره هواره کړي او د قدرت واګي په لاس کې ورکړي.
اوس سره له دې چې د ټولې چارې بشپړې شوې، او د کمیسیون مشرې اعلان هم وکړ چې ټول کارونه بشپړ شوي یواځې اعلان پاتې دی خو بیا یې هم د لړم تر ۲۳ مې یعنې نږدې شل ورځې وخت یې بیا دغه اعلان وځنډاوه، نو په دې سره اوس 30ملیونه افغانان خو پریږده چې 3 ملیونه له عقل نه خلاص افغانانو عقل به هم اوس خلاص شوی وي او پوهیدلې به وي چې لکه څرنګه یې چې پر وینو او سرونو لوبې روانې دي همدغه راز یې په رایو هم لوبې روانې دي، د رایو ورکولو یوه ذره ګټه هم نشته، بلکې هر هغه څه به کیږي چې سیف الملوک یې وایي او سیف الملوک یې غواړي، ځکه دا حکومت جوړ کړی سیف الملوک دی تمویلوي یې سیف الملوک او پایی د سیف الملوک په شیدو او موخه او هدف یې د سیف الملوک دی او قومانده د سیف الملوک دی، او د کار او کنټرول لپاره یې درملوک اجاره کړی. او ملت او د ملت رایې هسې په نوم تاج ملوک دی کنه په اصل کې یې رایې د املوکو په تول کې لاړې دي.
