(کابل ټکی کام، ۱۳۹۸ لړم ۱۶، پنجشنبه)
د اداري فساد پر وړاندې د مبارزې د څارنې او ارزونې کميټه يا “مک” وايي، چې افغانستان کې په خصوصي ښوونځيو کې ستونزې دي او د پوهنې وزارت پر ځينو ښوونځیو کنترول نه لري.
د دغه ادارې مشر میوند روحاني وايي، ځينو خصوصي ښوونځيو کې نصاب انګليسي ته اړول شوی، د یو شمير ښوونځيو فيسونه لوړ دي، ځينې نور بيا یو د بل تر منځ فاصله نه لري او دغه راز د پوهنې وزارت هم پر یو شمير ښوونځيو کنترول نه لري.
په عين حال کې د پوهنې وزارت هم يادې ستونزې تاييدوي خو زياتوي په افغانستان کې د خصوصي ښوونځيو د زياتوالي له کبله نه دي توانيدلي چې پر هغوی کنترول ترلاسه، نظارت او رسيدګي ورته وکړای شي.
د شنونکو په باور په پوهنې وزارت کې د فساد او بې غوريو له کبله د افغانستان په خصوصي ښوونځيو کې دغه حالت رامنځته شوی چې د پوهنې پر بهير ناوړه اغېز کولای شي.
د ميک ادارې په ۲۰۱۷م کال کې هم په پوهنې وزارت کې د فساد او بې غوريو موندنې له رسنيو سره شريکې کړې وې.
دا مهال په افغانستان کې زرګونه خصوصي ښوونځي فعاليت کوي چې ډير شمير يې د پوهنې وزارت سره نه دي رجستر شوي، چې کم شمير يې ښه ښوونيز چاپيريال لري او ډير شمير يې په ټولو معيارونو نه دي برابر.
