(کابل ټکی کام، ۱۳۹۸ لړم ۱۶، پنجشنبه)
د بوکينا فاسو چارواکي وايي، چې هيواد کې يې د کانونو پر يوې کاناډايي کمپنۍ بريد شوی چې له امله يې لسګونه کسانو ته مرګ ژوبله اوښتې ده.
د غه بريد پرون د چهارشنبې په ورځ هغه مهال شوی چې د (سيمفو) کمپنۍ پنځه بسونو کې کارکوونکي روان و.
د چارواکو په وينا، لومړی د پوځي بدرګې پر ګاډي چاودنه شوې او وروسته وسله وال برید پيل شو چې به ترڅ کې يې ۳۷ د يادې کمپنۍ کارمندان وژل شوي او شاوخوا ۶۰ تنه نور ټپیان دي.
تر اوسه د دغه بریدونو مسؤوليت کومې ډلې په غاړه نه دی اخيستی.
خو په بورکينا فاسو بهرني او په ځانګړي توګه فرانسوي ځواکونه ميشت دي چې پر وړاندې يې وخت ناوخت د بورکينافاسو او مالي هيوادونو د اسلامپالو ډلو د بریدونو هدف ګرځي.
تيره مياشت هم د دغه هیواد په شمال کې د سرزو پر یوه کان برید کې شل تنه وژل شوي و چې وروسته بيا د هیواد په پلازمينه اوګدايوګو کې زرګونه خلکو د بهرنيو ځواکونو پرضد مظاهرې وکړې او د هغوی د شتون پر خلاف يې شعارونه ورکول.
