(کابل ټکی کام، ۱۳۹۸ لړم ۱۶، پنجشنبه)
د ګالوپ په نامه د امریکا يوې څيړنيزې ادارې د نظر پوښتنې له مخې، افغانستان د نړۍ تر ټولو نا امنه هيواد بلل شوی دی.
ګالوپ اداره وايي، دغه نظر پوښتنه يې د نړۍ په ۱۴۲ هيوادونو کې کړې، ۱۵۲۰۰ کسانو سره يې خبرې او مرکې کړي چې په هر هيواد کې يې ۱۰۰۰ کسان پوښتلي دي.
راپور کې راغلي، چې له دغه زر کسانو پوښتنې شوي څو د خپل هيواد پر پوليسو څومره باوري دي، د تګ راتګ پر مهال څومره ډاډمن دي او ايا تير کال کې پرې بریدونه شوي که نه؟ چې افغانستان پکې له سل امتيازونو څخه ۳۸ وړي او له مخې يې له وينزويلا وروسته افغانستان په دوهم نمبر کې تر ټولو نا امنه هيواد بلل شوی دی.
نظرپوښتنه کې په ۱۰۰ کسانو کې یوازې ۱۳ افغانانو ځانونه خوندي احساس کړي او په سلو کې دوويشت افغانانو پر خپلو پوليسو د باور نظر څرګند کړی او پاتې نورو ويلي چې پر پوليسو باور نه لري.
د ګالوپ اداره وايي، د نظر پوښتنې پر وخت پنځوس سلنه افغانانو ورته ويلي چې ۲۰۱۸ کال کې غلو لوټلي او دغه راز ۲۹ سلنه نورو ورته ویلي چې بریدونه پرې شوي دي.
یاده اداره وايي، دغه مرکې او نظرونه يې د مخامخ خبرو او تيليفون له لارې له څوارلس نه د زياتو عمرونو لرونکو خلکو سره کړي دي.
په نظر پوښتنه کې سنګاپور لومړی درجه، تاجکستان دوهمه او متحده عربي امارت درېيمه درجه امن هيوادونه بلل شوي دي.
