د ټوېټر دوه کارکونکي سعودي ته په جاسوسۍ تورن شوي

کابل ټکى کام (پنجشنبه، ۱۶ لړم ، ١٣٩٨ل)

راپورونه وایي، د ټولنیزې رسنۍ ټوېټر دوه کارکوونکي چې یو یې د امریکا او بل یې د سعودي عربستان تبعه دی، د سعودي حکومتي چارواکو ته په جاسوسۍ تورن شوي دي.

دوی همدا راز له ایف بي ای سره د غلطو معلوماتو د شریکولو له امله هم مجرم ګڼل شوي دي.

د راپورونو له مخې دوی د سعودي عربستان له حکومت سره د هغو کسانو معلومات شریکول چې د آل سعود کورنۍ پر ضد یې څرګندونې کولې.

له دې ډلې د علی الزباره په نوم یوه کس د نږدې شپږ زره کاروونکو معلومات د سعودي عربستان له حکومت سره شریک کړي دي.

د ټوېټر کمپنۍ وایي، دوی دې ته متوجه دي چې د ډېرو کاروونکو ژوند یې له خطر سره مخ دی او په هېڅ صورت چا ته اجازه نه ورکول کېږي چې د کاروونکو شخصي معلومات یې له نورو سره شریک کړي.

دوی دواړو تر اوسه دخپرو شویو تورونو په اړه څه نه دي ویلي، خو ددې قضیې لا وضاحت به وخت وغواړي.