کابل ټکى کام (پنجشنبه، ۱۶ لړم ، ١٣٩٨ل)
تاجکستاني چارواکي وایي، هغه وسله واله ډله چې پرون یې له ازبکستان سره پر پوله له تاجکستاني پوله ساتو سره نښته کړې وه، داعشي ملېشې وې او له افغان خاورې تاجکستان ته دننه شوي وو.
دا برید چې پرون تر سره شوی وو، په پایله کې یې د دوو تاجک پوځیانو په ګډون ۱۷ داعشي جنګیالي ووژل شول.
برید د تاجکستان د پلازمېنې دوشنبې په ۶۰ کیلومټرۍ کې د ازبکستان پولې ته څېرمه شوی دی.
که څه هم تر اوسه د برید هدف روښانه نه دی خو تاجکستاني چارواکي وایي، دوی په دې اړه خپلې څېړنې پیل کړې دي چې جزیات به یې رسنیز شي.
د تاجکستان سرحدي ګارد په یوې خبرپاڼه کې ویلي، دا ۲۰ کسیزه ډله چې د کندوز له قلعه زال ولسوالي څخه تاجک خاورې ته دننه شوي وه، یوه ښځه هم پکې شامله وه.
دا راپورونه داسې مهال ورکول شوي چې داعشي ملېشې دهیواد په مختلفو ولایاتو کې دطالبانو له لوري ځپل شوي او لاهم د دې ډلې پر وړاندې دطالبانو دریځ سخت دی.
