کابل ټکى کام (دوشنبه، ۲۰ لړم ، ١٣٩٨ل)
ډیلي مېل ورځپاڼې دافغانستان ولسمشریزو ټاکنو په اړه په خپل مطلب کې لیکلي، د دې ډېر احتمال شته، چې ولسمشریزې ټاکنې د ۲۰۱۴ز کال په څېر یو ځل بیا د بحران خوا ته ولاړې شي.
ورځپاڼه زیاتوي، د تلې په ۶مه ډېرو کمو خلکو په ټاکنو کې برخه واخیسته او دغه بهیر د ګډ حکومت د دواړه شریکانو او نوماندانو ترمنځ له ناندریو ډک وو او اوس یې پر پایلو هم ورته چاره روانه ده.
د ډېلي مېل مطلب زیاتوي، عبدالله چې په تېرو دوو ټاکنو کې یې هم ناکام ګډون کړی او د خپلې سیاسي بقا لپاره هڅه کوي، په وار وار د سلګونه زره رایو د باطلېدو غوښتنه کړې ده.
ورځپاڼې لیکلي، د ۱۳۹۸کال ولسمشریزو ټاکنو ته ډېره هیله وه، چې د پخوا په څېر به له درغلیو پاکې وي؛ ځکه د بایو مېټریک دستګاوو د دوه ځلي رایې اچوونې مخه نیوله، خو دا ځل ټاکنې د پخوا په څېر یو ځل بیا له درغلیو ډکې ترسره شوې.
ډیلي مېل په پای کې لیکي چې د ټاکنو روانه لانجه، دا احتمال زیاتوي چې افغانستان به د ۲۰۱۴ کال د انتخاباتو په څېر یو ځل بیا د بحران خوا ته ولاړ شي.
ډیلي مېل داسې مهال د ټاکنو د پایلو د بحراني کېدو اټکل کړی، چې د ټاکنو کمېسیون رایې بیا شمېري؛ خو عبدالله عبدالله، رحمت الله نبیل او ګلبدین حکمتیار د بیا ځلي شمېرو سره خپل پرېکون اعلان کړی دی.
وروسته ترهغه چې اجرایه رئیس دټاکنو کمیسیون ته خبرداری ورکړ او د رایې بیاشمېرنې سره یې پریکون اعلان کړ، نن دنوموړي پلویانو په ځینې ولایاتو کې د دې کمیسیون یو شمېر دفترونه تړلي او کارکونکي یې په مرګ ګواښلي دي.
