کابل ټکى کام (پنجشنبه، ۲۳ لړم ، ١٣٩٨ل)
یوشمېر سرچینو خبر ورکړی چې په چین کې د افغان سولې په تړاو ځنډېدلې بین الافغاني غونډه به په نږدې ورځو کې جوړه شي.
د سولې په چارو کې ددولت وزارت هم ویلي چې په نږدې ورځو کې به په چین کې د افغانانو په ګډون د سولې غونډه جوړه شي.
ټاکل شوې وه دغه غونډه په تېره میاشت کې جوړه شي خو د نامعلومو دلایلو له امله وځنډول شوه.
اوس تازه د سولې په چارو کې ددولت وزارت وایي چې دوی د غونډې لپاره تیاري روانه کړې وه، چې مخ پر بشپړېدو ده او په نږدې ورځو کې به دغه غونډه جوړه شي.
د دې غونډې په اړه ویل شوي وو چې دواړه غاړې به په شخصي ډؤل ګډون کوي، دافغان سولې په اړه به خپل نظریات شریکوي، او هیڅوک دچا استازیتوب نشي کولای.
