کابل ټکی کام ۲۱وږی/۱۳۹۴
راپور: انصار
د نورستان ولایتي چارواکو منلې ده چې د کامدېش پر ولسوالۍ طالب وسله والو بریدونه پیل کړي، او د ولسوالۍ د امنیتي مسئولینو سره یې جګړه دوام لري.
د نورستان د ولایتي شورا رئیس انجینر سعادالله پاینده تأیید کړې ده چې ولسوالۍ د طالبانو لخوا محاصره شوې ده، خو که د ولسوالۍ د نیولو پر سر جګړه دوام ولري، امنیتي پولیسو سره دولت مرسته ونکړي، امکان لري ولسوالۍ سقوط وکړي.
د نورستان ولایتي چارواکو د کامدېش ولسوالۍ پر سر د طالبانو د لوري د ۹تنو د وژلو او ۱۴تنو د ژوبلو خبر ورکړی دی، خو دا هم تأییدوي چې ولسوالۍ د طالبانو لخوا محاصره او د محاصرې کړۍ وخت په وخت تنګیږي.
له بلې خوا ذبیح الله مجاهد چې د طالبانو د ویاند دنده ترسره کوي، رسنیو ته یې ویلي دي، د کامدېش په جګړه کې د دولتي چارواکو ادعا چې طالبانو ته مو زیاته مرګ ژوبله اړولې، بې بنسټه ده.
مجاهد وویل دولتي نظامي چارواکي په دا ډول ادعاګانو د خپلو پوځونو پرېوتی مورال لوړوي.
مجاهد رسنیو ته د ولسوالۍ د ۹ تنو د وژلو او ۱۲ تنو د ژوبلې خبر ورکړی دی.
د یادونې وړ ده چې د پنځو کالو را پدېخوا د نورستان او کونړ یو شمېر ولسوالۍ د درنو جګړو په دوام کې د دواړو خواوو د مرګونو شاهدې دي.
که د کامدېش پر سر جګړه دوام وکړي، دولتي پولیسو ته نظامي تجهیزات ونه رسیږي، نو په نږدې کې به ولسوالۍ سقوط وکړي.
