ترکیه: S – 400 توغوندي به کاروو؛ نمایش ته مو نه دي اخیستي
کابل ټکى کام (شنبه، ۲۵ لړم ، ١٣٩٨ل)
ترکیه وایي چې د امریکا له ټینګار سره سره به له روسیې اخیستل شوي توغندي وکاروي ځکه چې دا یې نمایش ته نه دي اخیستي.
د ترکیې ددفاعي صنعت مشر په تازه مرکه کې ویلي چې دوی له روسیې د نمایش لپاره نه بلکې د کارولو لپاره ایس ۴۰۰ توغندي اخیستي دي.
اسماعیل دیمیر وایي، دوی د خپل هېواد ددفاع او ساتلو مسئوول دي نو له همدې امله یې له روسیې ایس ۴۰۰ توغندي اخیستي دي.
د ترکیې دغه پرېکړه د امریکا له غبرګون سره مخ شوه او په ځلونو واشنګټن له ترکیې غوښتي چې له دغه پرېکړې په شا شي.
خو د ترکیې ولسمشر رجب طیب اردوغان وايي چې دوی د خپل هېواد ګټو ته ژمن دي او دا مسئله هېڅ هېواد ته زیان نه رسوي.
امریکا څو څو ځله ویلي چې ښایي پر ترکیه د ایس ۴۰۰ توغندیو د اخیستو له امله بندیزونه ولګوي.
ترکیې دا توغوندي درې میاشتې وړاندې له روسیې وپېرل چې امریکا پرې توند غبرګون وښود، او د ځینې تړونونو د لغوه کولو ګواښ ورته یې وکړ.
