کابل ټکى کام (سه شنبه، ۵ لیندۍ ، ١٣٩٨ل)
د کابل حکومت اجراییه رییس او ولسمشریزو ټاکنو ته نوماند عبدالله عبدالله په مشرۍ د ثبات او همپالنې ټاکنیزې ډلې ویلي چې له ټاکنو کمیسیون سره یې پیل کړیو خبرو کومه پایله نه ده ورکړې او د کمیسیون توضیحات ورته ناهیلي کوونکي وو.
د دې ډلې لومړي مرستیال بابر فرهمند نن ویلي چې یاد کمیسیون تر اوسه د هغو رایو په اړه پرېکړه نه ده کړې چې دوی یې د باطلېدو غوښتنه کړې وه.
فرهمند ویلي، ټاکنو کمیسیون د دولت جوړوونکي ټیم تر فشار لاندې دی او له همدې امله د تقلبي رایو پر باطلېدو بریالی شوی نه دی.
هغه زیاته کړې، که تقلبي رایې باطلې شي نو د دوی سهمیه ۵۱.۹۹ سلنه کېږي.
هغه د ټاکنو کمیسیون ته خبرداری ورکړی دی چې که چېرته تر راتلونکې شنبې پورې تقلبي رایې باطلې اعلان نه کړي نو دوی به خپل لاریونونه او مدني اعتراضونه لا پراخ کړي.
د یادونې ده چې د یادې ډلې پلویانو په اووه ولایتونو کې د ټاکنو کمیسیون سیمه ییز دفترونه تړلي دي او له پاکو رایو څخه د ناپاکو هغو د جلا کېدو غوښتنه کوي.
