کابل ټکى کام (جمعه، ۸ لیندۍ ، ١٣٩٨ل)
وسلوال طالبان وايي، د تیرې هفتې راهیسې يې په قطر کې د عالي رتبه امریکايي مأمورینو سره ملاقاتونه شروع کړي دي، او ښايي ډېر ژر د سولي رسمي خبري هم پیل شي.
د طالبانو ویاند ذبیح الله مجاهد زیاتوي،«زموږ موقف هغه پخوانی دی، که چیرې د سولې خبرې شروع سي، له هغه ځایه به پیلېږي چي درېدلي وې.»
طالبان وايي، ټرمپ بله چاره نه لري، مجبور دی چې خپل شکست ته د توجیه، او د روانې اوږدې جګړې د پای ته رسولو لپاره خپل ځواکونه له افغانستانه وباسي.
یو شمېر سرچینو خبر ورکړی چې د طالب او امریکایي بندیانو تر تبادلې وروسته دواړو خواوو په دوحه کې غیر رسمي مذاکرات پیل کړي دي.
د امریکا ولسمشر ډونالډ ټرمپ تیره شپه په یو ناڅاپي سفر د باګرام هوایي ډګر ته راغلی وو، نوموړي خپلو ځواکونو ته په خبرو کې ویلي وو چې طالبانو سره په یوې هوکړې کار کوي، او له افغانستانه به یو شمېر ځواکونه هم وباسي.
