کابل ټکى کام (یکشنبه، ۱۰ لیندۍ ، ١٣٩٨ل)
د امریکا په جنوبي ایالت ډکوټا کې د یوې الوتکې غورځېدو په پېښه کې نهه کسان وژل شوي او درې نور سخت ژوبل شوي دي.
د ای ایف پي اژانس د راپور له مخې د ډکوټا ایالت د شیمبرلین ښار څخه یوه امریکایي الوتکه ایډاهو ایالت ته د تګ په موخه هوا ته د پورته کېدو پر مهال له ستونزو سره مخ شوې او را غورځېدلې ده.
امریکایي چارواکي وایي چې په دې الوتکه کې ټولټال ۱۲ کسان ناست وو چې د پیلوټ او دوو ماشومانو په ګډون نهه کسان پکې وژل شوي او درې نور سخت ټپیان دي.
چارواکو په پیښه کې د ټپي شویو کسانو روغتیایي وضعیت د اندیښنې وړ بللی؛ خو روغتون ته یې د درملنې په پار لېږدولي دي.
د الوتکې د راغورځېدو علت د هوا خرابوالی ښودل شوی دی.
