(کابل ټکی کام، ۱۳۹۸ ليندۍ ۱۱، دوشنبه)
د فارياب ولايت سيمه ييز چارواکي وايي، چې د دغه ولايت په المار ولسوالۍ کې د ګډو ځواکونو د عملياتو پر مهال بهرنيو عسکرو او طالبانو ته تلفات اوښتي دي.
د فارياب د والي وياند احمد جاوید بيدار وايي، دغه عمليات د طالبانو په مرکزنو ترسره شوي چې د هغوی له غبرګون سره مخ شوي او دواړو غاړو ته پکې مرګ ژوبله اوښتې ده.
په سیمه کې د پژواک اژانس خبریال قطب الدين کوهي وايي، چې سیمه ييزو چارواکو په دغه برید کې د دوو بهرنيانو د ټپي کيدو او پنځو طالبانو د وژل کيدو خبر ورکړی.
خو زياتوي، یوه سیمه ييز طالب قومندان ورته ويلي چې په دغه نښته کې يې د سنايپر ځانګړې وسلې څخه په ګټه اخيستو څلور بهرنيان ويشتلي او د دوی یوازې یو طالب وسله وال ټپي شوی دی.
طالبانو په خپله رسمي ويب پاڼه الاماره د يادې جګړې په اړه لیکلي، چې ګډو ځواکونو غوښتل په سیمه کې عمليات وکړي خو د طالبانو له غبرګون سره مخ شوي زياتوي په بریدونو کې د طالبانو له خوا درنې او ليزري وسلې کارول شوي چې ګډو ځواکونو ته پکې تلفات اوښتي دي.
خبرپاڼه کې د یوه طالب د ټپي کيدو خبر ورکړل شوی دی.
تر اوسه په افغانستان کې ميشت بهرنيو ځواکونو هغوی ته د اوښتو تلفاتو په اړه څه نه دي ويلي.
ډير کله بهرنيانو ته په شپنيو عملياتو، چاپو، ګزمو، چاودنو، وسله والو بریدونو او ميزایل وارونو کې بهرنيو ځواکونو ته تلفات اوړي خو بهرنيان د خپلې پاليسې له مخې دغه تلفات له رسنيو پټ ساتي.
