د ۲۰۳ قول اردو قومندان خان الله شجاع او د ولسي جرګې غړي نصیب الله مقبل شخړه کړې
کابل ټکى کام (دوشنبه، ۱۱ لیندۍ ، ١٣٩٨ل)
راپورونه وایي، په ولسي جرګه کې د پکتیا د خلکو استازي نصیب الله مقبل او د ۲۰۳ تندر قول اردو قومندان خان الله شجاع په یوه امنیتي غونډه کې شخړه کړې ده.
مقبل وویل، څو ورځې وړاندې د پکتیا ولایت په مقام کې د ډنډ پټان ولسوالۍ او ګردیز تر منځ لارې د امنیت په اړه امنیتي غونډه رابلل شوې وه .
نوموړی وايي، پر دغه لار وخت ناوخت دولتي کسان د وسله والو طالبانو له لوري تر بریدونو لاندې راځي او وژل کېږي.
د مقبل په وینا کله یې چې ددغې لارې د امنیت په اړه د ۲۰۳ تندر قول اردو له قومندان وپوښتل، نوموړی دده په خبرو غوسه شو او ساتونکو یې پر ده ګوزارونه وکړل.
مقبل وايي، د څو ساعتونو لپاره د قومندان د ساتونکو لخوا کوټه قلف او وهل شوی هم دی.
مقبل د ولسي جرګې په امتیازي ساعت کې د خبرو پر مهال وویل، په دې پېښه کې والي او د امنیې قومندان هم ټپيان شوي دي.
مقبل تاکید وکړ چې په دې اړه ټاکل شوی پلاوی باید په ازادانه توګه څېړنه وکړي، او مجرمینو ته دې سخته سزا واوروي.
