غورځنګ
اوسنيو عربو او خصوصاً د عربي نړۍ واکمنانو اېران خپل يوازېنی دښمن جوړ کړی دی او دخپلو خبرو په سر او پای کې د اېران نوم اخلي. له دې وړاندې هم عربي ممالکو اېران ته د دښمن په سترګه کتل ځکه نو صدام حسين د عراق پخواني رئيس جمهور پر اېران بريد وکړ. که څه هم په هغه بريد کې اېران ماتې هم وخوړه خو دغه دسيسه اصلاً د عراق لپاره امریکا او نور غرب جوړه کړې وه تر څو د عراق لږ و ډېر زور لومړی په اېران وکارېږي او کله چې بيا ورباندې غرب او امریکا بريد کوي نو چې په عراق کې دومره شیمه نه وي پاتې چې د غرب او امريکا په وړاندې يې ودرېږي.
همداسې وشول، اېران خپله ماتې ومنله او صدام حسين دخپل قومي غرور په سیند کې ځان نور هم لاهو کړ او په خپلو نورو عربو يې هم ورودانګل، په لنډو ټکو بايد ووايو چې صدام حسين دومره پر خپل ځان مغرور شو چې نور يې نو له هر هېواد سره په معمولي خبرو جنګ غوښت. خو امريکا او غرب په خپلو شومو پلانونو کې کامياب شول او عراق يې چې کله جګړه ځپلی وليده نو پرې راوې دانګل او ويې نيو. خو اېران لا تر اوسه هم پر خپل حال پاتې دی.
خو اوس هم ټول عربي ملکونه په پوره حماقت سره وايي چې اېران مو تر ټولو سخت دښمن دی. او له امریکا څخه غواړي چې اېران په هر صورت وځپي.
عرب واکمنه طبقه په دې نه پوهېږي چې څو کاله مخکې په لېبيا، شام او نورو عربي هېوادونو کې چې امريکا د عربو د سپرلي تر نامه لاندې کوم پلانونه جوړ کړل، د چا په ګټه وو؟ او چا ته يې زيان واوښت؟؟
د عربو د سپرلي تر نامه لاندې پاڅونونه په معنوي او مادې لحاظ امريکا ته پوره ګټه ورسوله او امريکا له دغه ډول پلانونو څخه څو ګټې تر لاسه کړې چې د هغو له جملې څخه امريکا په دغو پاڅونوالو خپله هغه وسله خرڅه کړه چې په اروپايي او امريکايي بازارونو کې نوره زړه شوې وه، دغه شان امريکا په دغو پاڅونونو کې د عربو هغه شاهان راوپرځول چې امريکا ته يې په عربي نړۍ کې يو څه ګواښ پېښولی شو او په عربي نړۍ کې يې د امريکا ګټې په خطر کې اچولی شوې. دارنګه د دغو پاڅونونو په ترڅ کې امريکا د عربو ټول زور وازمايه او عرب يې په هر لحاظ وازمايل چې د جګړې څومره وړتیا او استعداد لري؟ امريکا د عربي نړۍ د دغه ډول ارزونې په ترڅ کې د داعش ډله رامنځته کړه چې تقريباً پنځه شپږ کاله يې په پوره برياليتوب سره وجنګوله. خو کله چې د دوی له ګټې ولوېدله نو يې بېرته د له منځه وړلو هڅې پيل کړې.
دا هم ويل کېږي چې امريکا په عربي صحراوو کې خپلې کېمياوي وسلې ازمايلې چې د دې لپاره د عربو ويښ خلک له منځه وړل ؤ. کله يې چې د عربو ويښ خلک له منځه يووړل نو بيا يې د هر ډول کېمياوي وسلو استعمال وکړ.
بل لور ته په عربي نړۍ کې يو بل د شيطان ځاله هېواد اسرائيل چې د امريکا قوي دوست دی او د امريکا او برتانيا په پوره همکارۍ او مرسته منځته راغی. نو د اسرائيلو په فرمايش يې عربي ملکونه ټول وځپل، څوک يې په خپلو شاهي نظامونو او عسکرو وځپل او څوک يې بيا په خپلو مستقيمو يرغلونو باندې وځپل، اوس دا دی د شام په سيمو کې اسرائيل ورځ تر بلې پرمختګ کوي او نوې سيمې نيسي.
د دې ټولو دسيسو په وړاندې لا هم عرب يوازې غلي او چپ نه بلکې لا هم د امريکا په خوله خپل ولسونه وژني او د خپلو ولس روحانيون يا زندانونو ته اچوي او يا يې هم په خورا دهشت سره په شهادت رسوي.
بل خوا امريکا لا هم د عربي نړۍ لپاره اوبه خړوي او اېران نه يې ورته زمری جوړ کړی دی، عرب پرې وېروي، کله چې په عربي نړۍ کې کومه پېښه وشي نو امريکا يې په عربو ور اړوي، سعودي او نور عربي ممالک هم د امريکا په خولې پسې ځي، په داسې حال کې چې د دا ډول پېښو تر شا د امريکا، ناټو، برتانيې او اسرائيلو لاس وي.
خو عرب يې بيا هم پر اېران ور اړوي.
چې د دې پواسطه سعودي او عربي نړۍ ورو ورو د امریکا او غرب غېږې ته لوېږي او ورځ تر بلې خپل هر څه په امریکا پلوري او ان د دې لپاره چې اوس سعودي د دې لپاره چې ټرمپ او نوره کفري نړۍ خوشحاله وساتي، د مسلمانانو په مرکزي سپېڅلې خاوره يې سينماګانې او نور د عياشۍ او فحاشۍ ډول ډول ځايونه او کلبونه جوړ کړل.
