کابل ټکی کام (چهارشنبه، ۱۳ ليندۍ، ۱۳۹۸ل)
د ګډ حکومت لویه څارنوالي لوګر ولایت کې د ماشومانو د جنسي ځورونې په هکله د شوو ادعاوو د تحقیق او څيړلو لپاره د يو پلټونکي هیئت جوړولو خبر ورکوي.
د لويې څارنوالۍ د ویاند ‘جمشېد رسولي’ په خبره د لويې څارنوالۍ د مرستیال تر مشرۍ لاندې يې يو پلټونکی هيئت ټاکلی، چې په لوګر ولایت کې د زده کوونکو د جنسي ځورونې قضیه وڅيړي.
د یادونې وړ ده، چې څه موده وړاندې د مدني ټولنو رییس داسې راپورونه خپاره کړل، چې ګواکي د لوګر ښوونځيو کې ۵۰۰ تنه زده کوونکي له جنسي پلوه ځورول شوي دي.
له دې انکشاف وروسته د لوګر د مدني ټولنو رییس د ملي امنیت له لوري ونيول شو. او وروسته يې داسې ويډیو خپره کړه، چې نوموړی پکې خپل خپور شوی راپور غلط ګڼي او په دې اړه یې بښنه وغوښته.
