څارنوال حشمت عبیدي
د قدرتونو د وېش له مخې د سړې جګړې له پای سره چې د امریکا دفاع او د بهرنيو چارو پخواني وزیر (هنري کسینجر) او په یاد وزارت کې لوړ پوړي مامور فوکویاما چې د سیاسي علومو ماهر دی، دواړه د هغه نوي نړیوال نظام طراحان او وړاندوینه ویونکي وو چې له مخې یې د لیبرال دموکراسۍ د حاکميت په نوم په ټوله نړۍ کې د پخواني شوروي اتحاد له ماتې وروسته امریکا ته د يواځيني زبرځواک او د نړۍ په هیوادونو کې د لاسوهنو حق ورکولو طرحه وړاندې کړې وه چې ورسره د امریکا د وخت ولسمشر(زوی بوش) د جکسونیزم او ویلسونیزم سیاست نور هم ګړندی کړ
د جکسونيزم او ويلسونيزم تر نامه لاندې دوه هغه امريکايي سياستونه دي چې لومړی يې د امریکا د ګټو لپاره په نړۍ کې د لاسوهنو او قدرت نیونو او دوهم يې د امریکا ارزښتونه په زور په نړیوالو منل غواړي.
اوس یو ځل بیا هنري کسینجر یوې امریکایي ورځپاڼي سره پداسې حالاتو کې په خپله تازه مرکه کې له ډېرې مودې سکوت وروسته ویلي دي چې:
دریمه نړیواله جګړه به پيلیږي او دا جګړه به د اسرائيلو لپاره له ډار پرته د منخني ختیځ برخې ځپي او اووه عربي هیوادونه به اشغالیږي، چې له یوې خوا په فرانسه کې د یهودو پرخلاف کرکه زیاته شوې او د یهودانو په قبرونو د نازي واکمنۍ نښانونه لګول کیږي او له بلې خوا د ناټو په وروستۍ (دوه ورځې مخکينۍ) غونډه کې د ګڼو مشرانو او په ځانګړي ډول د مکرون ( فرانسې ولسمشر ) لخوا د ناټو په سیاست سختې نيوکې شوي؛ چې مرکزي ټکي يې د روسیې او چين پر خلاف د ناټو د پالیسيو عیاریدل او د ترکیې لخوا د داعش پر ځای د کردانو پرخلاف جګړې ته شين څراغ ښودل دي.
او هم د اسلامي نړۍ مطرح هيوادونه (ترکيه، مالیزيا، اندونيزیا، قطر او پاکستان) د يو نوي اسلامي ځواک او بلاک تشکیلولو لپاره سره همغږي ښودلې چې په قطر کې د خالد بن ولید په نوم ستره هوايي اډه جوړېدل او هم د یونان او قبرس د ګټو خلاف د اردوغان لخوا د لیبیا د وفاقي حکومت له مشر فایز سراج سره په نږدې اوبو کې د نوو پلټنو هوکړه شوې ده او هم امریکا د سیمې دوه سترو ځواکونو ( روسيې او چين ) لخوا ګواښل کیږي، لکه چې تېره ورځ هم د شوروي وروستني ولسمشر ګورباچوف په افغانستان کې د امریکايي قواوو بقاء نوره د نړیوال امنيت لپاره ګواښ وګاڼه او ایران سره د برجام تړون کې د امریکا ماتې چې نورهیوادونه ورسره ډېر همغږي نه ښکاري، دا ټول هغه لاملونه دي چې هنري کسینجر يې بيا میدان ته راووېست، څو د امریکا پاشل کېدل او یا کم تر کمه له زبرځواک قوت څخه ستر ځواک ته د کښته کېدو او یا د نړۍ د يو قطبي کېدو څخه د څو قطبي کېدو په لوري تګ څخه وساتي، هغه څه چې د امریکا د طبیعي مرګ پيلامه به وي.
کسینجر د فرانسې او نورو اروپايي قوتونو لکه برتانيه او المان د سیاستونو د غندلو پرخای د دریمې نړیوالې جګړې موخه د ایران ختمول او د عربي هیوادونو د یهودو په لاس د اشغالولو خبره ځکه کړېده چې په ناټو کې د غړو ۲۷ هيوادونو له جملې څخه ۲۲ هيوادونو د قدس په اړه د ملګرو ملتونو د کميټې د هغې پریکړې چې د یهودي آبادکاریو خلاف او د فلسطینیانو په حق کې پرېکړه او ملاتړ کړی دی. نو ځکه اوس کسینجر د خپل نړیوال نظام د ساتنې په خرافاتو ویلو او فال نیولو پیل کړی دی.
نو ويلای شو چې کسينجر اوس دامریکا لپاره داسې خبرې کوي، تر څو امريکا د طبيعي وېش له ګواښه وژغوري او يا يې د امریکا پخوانی حيثيت وساتي.
