کابل ټکی کام (شنبه، ۱۶ ليندۍ، ۱۳۹۸ل)
د افغانستان د بیا رغونې لپاره د امریکا د څار ادارې (سیګار) د امریکا کانګرس ته په خپل درې میاشتني راپور کې ویلي چې امریکا له ۲۰۰۲م کال څخه تر اوسه په افغانستان کې د نشه یي توکو پر وړاندې مبارزه باندې نږدې نهه میلیارده ډالر لګولي دي.
راپور زیاتوي، چې د دومره زياتو روپيو له مصرف سره سره، بيا هم نه یوازې د نشه یي توکو پر وړاندې جګړه بریالۍ شوې نه ده؛ بلکې په دې هېواد کې د نشه یي توکو کښت او کاروبار ډېر شوی هم دی.
که څه هم تېر کال د وچکالۍ له امله په افغانستان کې د کوکنارو په کښت کې يو څه اندازه کموالی راغلی؛ خو لا هم دا هېواد د نړۍ په کچه د نشه يي توکو د تولید تر ټولو ستر هېواد دی.
د يادونې وړ ده، چې ځينې کارپوهان په دې اند دي، چې امریکا په افغانستان او سيمه کې د نشه يي توکو ستر کاروباري هيواد دی، او د دوی له لوري د نشه يي توکو پر وړاندې مبارزه يوازې نمایشي بڼه لري.
