کابل ټکى کام (یکشنبه، ۲۴ لیندۍ ، ١٣٩٨ل)
له هغه وروسته چې له افغانستانه د امریکایي سرتېرو د وتلو په اړه این بي سي او نورو رسنیو راپورونه ورکړل، دکابل ادارې وارخطایي وښودله او په حضور یې ټینګار وکړ.
د کابل ادارې د مشر ویاند صدیق صدیقي که څه هم له افغانستانه د امریکایي سرتېرو وتل پر جګړې بې اغېزه بولي خو ټینګار کوي چې دوی لا هم د بهرنیو پوځیانو حضور ته اړتیا لري.
هغه زیاته کړې، له وسلوالو سره مبارزه لکه څنګه چې ګډه پیل شوې وه لا هم ګډې مبارزې ته اړتیا لري.
هغه زیاته کړې، له دې سره سره چې پر جګړه د بهرنیو پوځیانو حضور کوم اغېز نلري خو په وینا یې د دې پوځیانو لویه برخه به په افغانستان کې پاتې شي.
د یادونې ده چې یو شمېر امریکایي رسنیو راپور ورکړی دی چې ډونالډ ټرمپ به راتلونکي اوونۍ له افغانستانه د خپلو ۴۰۰۰ سرتېرو ایستلو پرېکړه اعلان کړي.
دې رسنیو که څه هم نور جزیات نه دي ورکړي؛ خو شنونکي دا دمذاکراتو یوه برخه ګڼي چې طالبان به یې مقابل کې اوربند او بین الافغاني خبرو ته تیاری وښیي.
