راپورتاژ: عقاب افغان الحنفي
له اتلس کلنې خونړۍ جګړې وروسته واشنګټن پوسټ ورځپاڼې ناڅاپه په حقایقو خوله خلاصه کړه، ورځپاڼې داسې اسناد وړاندې کړل چې د امریکایي حکومتونو له لوري ښکاره شوي راپورونه یې ټول دروغ ثابت کړل.
د دې ورځپاڼې اسنادو په افغانستان کې د اشغال له حقیقته پرده پورته کړه، امریکایي چارواکي، نظامیان او استخبارات یې دروغجن ثابت کړل، رسنۍ یې کاذبې وبللې، او دنورو افشاګریو ترڅنګ یې د کابل ادارې چارواکو ته د غلامانو خطاب وکړ .
له کومې ورځې چې واشنګټن پوسټ ورځپاڼې د دې مستندو شواهدو افشاګري کړې، افغان جګړه او دامریکایي حکومتونو درواغ د دې هیواد د رسنیو سرلیک ګرځېدلی.
شنونکي او سناتوران د دې غمیزې د حل په اړه له هغه څه ډیر بدل شوي چې جنګ خوښو سناتورانو او پوځي جنرالانو به پرې ټینګار کاوه؛ چې هغه د نظامي قوت استعمالول دي.
دبیلګې په توګه:
امریکایي سناتور راند پال د واشنګټن پوسټ د دې راپور په اړه په تازه څرګندونو کې ویلي چې امریکايي چارواکو له کلونو راهیسې په افغانستان کې د یوې خونړۍ جګړې په اړه خلکو ته دروغ ویلي دي او په دې اړه باید وضاحت ورکړل شي.
دده په خبره امریکا اتلس کاله په افغانستان کې جګړه کړې ده، میلیاردونه ډالر یې لګولي دي، زرګونه سرتېري یې دغه هېواد ته استولي دي خو امریکايي ملت په دې نه پوهېده چې هلته څه روان دي او دوی د څه لپاره تللي دي.
بلې خوا په افغانستان کې د امریکا پخواني سفیر راین کراکر واشنګټن پوسټ ورځپاڼې ته په خپله مقاله کې د دې ورځپاڼې له لوري، د هغو اسنادو افشا کېدل ستایلي دي چې له مخې یې ویل شوي وو، امریکایي مشرانو د افغان جګړې په اړه خلکو ته دروغ ویلي دي.
یاد ډیپلوماټ په خپله مقاله کې لیکلي، افغانستان د امریکا لپاره په دویم ویتنام بدل شوی دی، راځئ د دې ناکامې ویتنامۍ شکلې جګړې ته دپای ټکی کېږدو.
هغه زیاته کړې، امریکا باید په دې اعتراف وکړي چې افغان جګړه یې بایللې او په خبره یې؛ اوس له دې هېواده د سترتېرو د ایستلو وخت دی.
یوې بلې مشهوره امریکايي سیاسي مبصرې او لیکوالې اغلې کاترینا واډین هیویل، د ډسمبر پر ۱۷ په واشنګټن پوسټ کي لیکلي، څرنګه چي د امریکا جمهورریسانو، وزیرانو، جنرالانو، نظامي او ملکي عالي رتبه چارواکو د افغانستان د ۱۹ کلني ماتې په اړه موږ امریکایانو ته مدام درواغ ویلي دي، نو لهذا د هغوی سره باید حساب او کتاب وسي.
بوش او اوباما دواړه د حق او رشتیا سره په جنګ کي ول، هغوی درواغجن او فریب کاره ول.لیکواله لیکي اوس څه باید وسي؟ اول، کانګرس باید د دې جنګونو په اړه عامې استعماعیه غونډې ترتیب کړي. کانګرس باید پر جنګونو باندي نظارت قوي او زیات کړي.
دا زیاتوي، تر ټولو مهمه دا ده چي کانګرس باید د خپلي ناکامۍ او غفلت په اړه تحقیقات وکړي. د ټرمپ په شمول د جمهوري ریاست د نورو کاندیدانو څخه باید دا سوال وسي چي هغوی به د دې ناکامه جنګونو په اړه څه وکړي.
امریکايي رسنۍ هم باید په خپل ګریوان کي وګوري، ځکه هغوی مدام د سترو فریب کارانو، لکه جنرال پټریس او جنرال مک کریسټل، سره مصاحبې کولې، خو پر هغو امریکايي مبصرینو يې سترګي پټولې چي د دې ابدي جنګونو مخالف ول.
راند پال یوځل بیا د واشنګټن پوسټ د راپور په اړه په تازه څرګندونو کې تاکید کړې چې امریکايي چارواکو له کلونو راهیسې په افغانستان کې د یوې خونړۍ جګړې په اړه خلکو ته دروغ ویلي دي او په دې اړه باید امریکایي حکومتونه محاکمه شي.
له دې تولو تحولاتو مالومیږي چې امریکا غواړي ځانته بهانه برابره کړي او ژر تر ژره طالبانو سره د یو تعهد په ترڅ کې له افغانستانه ووځي او دې مبهمې او بې هدفه جګړې ته د پای ټکی کیږدي.
