غورځنګ
امريکا د يرغل له پيله دا هڅه کوي چې په افغانستان کې خپل تلفات کم وښي، امریکا که څه هم په دې کې خپلې ګټې په پام کې لرلې خو دا دی يوه اونۍ وړاندې واشنګټن پوسټ دغه ټولې خبرې رسوا کړې او د پوځ اصلي تلفات کوم چې امریکايانو اعلان کړي وو؛ د واشنګټن پوسټ د اعلان مطابق ترې څو چنده زیات دي.
خو دا چې امريکا دغه هر څه پټ ساتلي وو لاندې ګټې يې ورڅخه لرلې:
۱ـــ امريکا چې له پخوا راهيسې يې د استعمارګرو څېره خپله کړې او استعمارګر بيا دا خاصيت لري چې په خپلو مستعمراتي هېوادونو کې خپل پوځي تلفات او خساره کمه ښيي د دې لپاره چې خپل ولس يې پر وړاندې رااوچت نشي او د دوی مستعمراتي سوچ او يرغليز پلانونه له خاورو سره خاورې نه کړي. نو دا چې امريکا هم مستعمراتي او يرغلګر هېواد دی نو ځکه خپل تلفات کم ښيي.
۲ـــ امريکا د خپلو تلفاتو د کمو ښودلو هڅې ځکه پخوا کړي دي او کوي يې هم تر په دې واسطه وکولی شي چې مقابل لوری کوم چې د امریکا پر وړاندې د خپلې ازادۍ لپاره جنګېږي؛ په دې واسطه کمزوری وښيي او خپل ځان دومره قوي وښيي چې تلفات يې کم دي، يعنې خپل تلفات د مقابل لوري د دريځ د کمزوري کولو لپاره کم ښيي.
۳ـــ امریکا خپل تلفات ځکه کم ښودل تر څو خپل ولس ته وښيي چې په جګړه کې بريالي دي او مقابل لوري ته يې ماتې ورکړې ده. يعنې د دې پواسطه امريکا غواړي چې مقابل لوری کمزوری وښيي او خپل پوځ نړۍ ته قوي او ځواکمن وښيي.
۴ــ دغه شان امريکا د دې لپاره چې د مقابل لوري مورال ضعيف کړي، يعنې په کوم بريد کې چې مقابل لوري (طالبانو) به امريکايي پوځيانو ته د زياتو تلفاتو اړولو ادعا وکړه نو دستي به امريکا د طالبانو راپور رد کړ او خپل تلفات به يې کم وښودل تر څو په دې واسطه د طالبانو مورال ضعيف کړي.
۵ـــ په هر بريد کې چې طالبانو به امریکايي پوځيانو ته د زياتو تلفاتو د اړولو دعوه وکړه نو امریکايي رسنيو به يې راپور رد کړ او خپل تلفات يې ډېر کم وښودل، تر څو طالبان درواغژن معرفي کړي او په افغان ولس کې د طالبانو په خلاف کرکه راوپاروي،
خو دا چې حق او باطل تر خپل منځ همېشه ټکر کړی او د تل لپاره حق بريالی شوی دی، نو که څه هم له دې وړاندې امريکايانو فکر کاوه چې حقيقي ځاني، مالي او نور هر ډول تلفات به يې څوک رسوا او نړيوال نه کړي، نو په دې اساس له هر ډول رسوايۍ څخه ډاډه وو، خو دا دی تېره اونۍ واشنګټن پوسټ له ټولو امريکايي رازونو څخه پرده پورته کړه، واشنګټن پوسټ په اسنادي ډول ليکلي وو چې پلاني او پلاني جنرال چې په خپلو وختونو کې يې په افغانستان کې د امريکايي ځواکونو قومنداني او مشري کړې ده؛ د خپلو تلفاتو شمېر يې په دغه او دغه تاريخ د دې لپاره کم ښودلی تر څو امريکايي ولس په غفلت کې واچوي او په افغانستان کې خپلې ګټې تأمين کړي.
خو الله ج د حق د بريالي کېدو وعده کړې ده چې دا دی له مخې يې ټول هغه امریکايي رازونه افشا شول، چې امريکا او سي ای اې يې د پټولو هڅه کوله او په دې اړه يې هيڅ ډول راز چا ته نه ؤ ويلی.
