کابل ټکی کام (چهارشنبه، ۲۷ ليندۍ، ۱۳۹۸ل)
د روسیې د ملي امنیت سلاکار امریکا تورنه کړې چې په افغانستان کې د ا ګډوډۍ رامنځته کولو لپاره داعش وسلواله ډله تميلوي.
نیکولای پتروشیف دا څرګندونې په تهران کې د سیمه ییز امنیتي کنفرانس ګډونوالو ته په وینا کې کړي دي، د نوموړي په خبره: ” په دې اړه کره اسناد او شواهد شته چې امریکا له سوريې او عراق څخه افغانستان ته د داعش جنګیالیو په لېږد کې لاس لري”.
دغه راز پتروشیف په افغانستان کې د امریکا په ۱۸ کلن حضور هم انتقاد کړی او ویلي يې دي :”امریکا د خپلو ځواکونو د ایستلو هیڅ پلان نه لري، داسې ښکاري چې امریکايي مشران د ځواکونو په ساتلو او ایستلو یو تر بله اختلاف لري.”
د ياونې وړ ده، چې له دې وړاندې هم ځينې د افغانستان د پارلمان وکيلانو او د سيمه ايزو هيوادونو چارواکو هم ويلي و، چې امريکا په افغانستان او سيمه کې د داعش ډلې ملاتړ کوي.
