کابل ټکی کام (شنبه، ۳۰ ليندۍ، ۱۳۹۸ل)
د روسیې استخباراتي ادارې ویلي، په پلازمېنه مسکو کې ددې ادارې پر کارکونکو يوه وسله وال ډزې کړې چې په پايله کې یې یو تن وژل شوی او پنځه تنه نور سخت ژوبل شوي دي.
دراپورونو له مخې پېښه ددې ادارې مرکز ته څيرمه په داسې مهال شوې چې روسيې د امنیتي خدماتو د ورځي په وياړ مراسم لمانځل کيدل.
د مسکو د امنیتي چارواکو په خبره خدماتو برید د یوه تن له لوري ترسره شوی او په متقابلو ډزو کې بریدګر هم وژل شوی دی، دې چارواکو زیاته کړې، بریدګر ونه شو کولی چې د يادې ادارې مرکزي ودانۍ ته ننوځي.
په برید کې د یادې ادارې د یوه افسر د وژل کېدو تر څنګ ۵ کسان ژوبل شوي چې د دوو تنو یې روغتیايي وضعیت نازک ښودل شوی دی.
تر ډزو وروسته د پېښې ځای ته ورغلې ټولې لارې تړل شوي او د روسیې د استخباراتو ادارې په دې اړه څېړنې پیل کړي دي.
تراوسه د برید انګېزه نه ده معلومه خو ياده پېښه هغه مهال رامنځته شوه چې د روسیې ولسمشر “ويلاديميرپوتين” په کرملين ماڼۍ کې د امنیتي خدماتو د ورځې د لمانځو په پار جوړو شویو مراسمو ته وینا کوله.
