د ايغور مسلمانانو اړوند د شاهد افريدي څرګندونو ته د چينايي چارواکو غبرګون
(کابل ټکی کام، ۱۳۹۸ مرغومی ۴، چهارشنبه)
د چين د ايغور مسلمانانو په اړه د پاکستان د کرکټ مشهور لوبغاړي شاهد افريدي څرګندونو ته چينايي چارواکو غبرګون ښودلی دی.
شاهد افريدي د روانې دسمبر مياشتې پر ۲۲ نيټه پر خپله رسمي ټويټرپاڼه په چين کې د ايغور مسلمانانو ظلمونو ته اشاره کړې او له پاکستاني لومړي وزير عمران خان څخه يې غوښتي چې د ايغوري مسلمانانو سره د چين د تبعیضي چلند په اړه خپل غږ پورته کړي.
شاهد افريدي په دغه ټويټر کې چې څه وخت وروسته يې بيرته ړنګ کړی ليکلي و: ”په چین کې د اویغور مسلمانانو له حالته له خبرېدو وروسته سخت خواشینی یم، له لومړي وزیر عمران خانه درخواست دی، چې تاسې چې د امت د اتحاد خبرې کوئ، نو په دې تړاو هم فکر وکړئ او د چین له حکومته غوښتنه ده چې د خدای لپاره په خپل هېواد کې له مسلمانانو سره تبعیضي چلند پرېږدئ. ”
افريدي خپل ټويټر پيغام کې په پاکستان کې د چين سفارت هم ټګ کړی و چې په ځواب کې يې د چين سفارت یوه لوړپوړي کارکوونکي د ايغور مسلمانانو سره د چين د ناوړه کړنو راپورونه خپريدل د لويديځوالو پروپاګند بللی.
د ليجن چاو په نوم د چين سفارت دغه لوړپوړي چارواکي ليکلي: زه فکر کوم، د چین پر ضد د لوېدیځوالو پروپاګند لاره درنه ورکه کړې زياتوي : ”که تاسې غواړئ له نژدې د چین سینکیانګ ایالت ووینئ، موږ مو هرکلي ته چمتو یو. لوېدیځوال چین بدناموي او د مسلمانانو احساسات ځپي. ”
په وروستيو کې داسې راپورونه خپاره شول چې چين د سينګيانګ په ايالت کې لسګونه زره مسلمانانو سره ناوړه چلند کوي، هغوی د خپل دين چارو ترسره کولو، لمانځه، روژې او نورو عبادتونو ته نه پريږدي، زرګونه کسان يې زندان ته ورته يوځای کې ساتلي او پر هغوی شپه ورځ څارنه کوي.
