(کابل ټکی کام، ۱۳۹۸ مرغومی ۵، پنجشنبه)
د نيويارک ټايمز ورځپاڼې د راپور له مخې، امريکا په وروستيو کې هڅه پيل کړې چې خپل ټول نظامي ځواک راټول او د روسيې او چين د مقابلې لپاره يې چمتو کړي.
سرچينه زياتوي چې د امريکا دفاع وزارت پر دې غور پيل کړی څو له افريقا څخه ټول امريکايي ځواکونه راوباسي او یا يې شمير تر ټيټې کچې کم کړي.
نيويارک ټايمز ليکي، دا مهال په افريقا کې اووه زره امریکايي عسکر ميشت دي چې هلته د بوکو حرام او نورو ډلو پر وړاندې جګړه کوي چې پر عملياتو او نورو پوځي اړتياوو يې هر کال پنځه څلويښت ميليارده ډالره لګښت راځي.
د سرچينې په وينا، امريکا د نړۍ په بيلابيلو هيوادونو کې دوه لکه عسکر لري خو په وروستيو کې د امريکا دفاع وزارت هڅه پيل کړې چې د افغانستان، عراق او لاتيني امریکا په شمول له ځينې نورو هيوادونو هم خپل عسکر را اوباسي او ځان په وړو وړو جنګونو کې ښکيل نه کړي.
د نيويارک ټايمز راپور کې راغلي، چې د امريکا دفاع وزير مارک ايسپر چې څه موده مخکې افغانستان ته راغلی و نو دلته يې خپلو پوځي قومندانانو ته امر کړی و څو د چين او روسيې د مقابلې لپاره پر نورو ملکونو کې د امریکايي ځواکونو پر راکمولو غور وکړي، او ځان د يادو حريفو هيوادونو مقابلې ته چمتو کړي.
