طالبانو د یوه ځانګړي تکتيک په کارولو پوځي مرکز نيولي، ۲۶ عسکر وژل شوي
(کابل ټکی کام، ۱۳۹۸ مرغومی ۷، شنبه)
طالبانو د هلمند ولايت په سنګين ولسوالۍ کې د دولتي ځواکونو یو پوځي مرکز نيولی چې په ترڅ کې يې لسګونه عسکرو ته مرګ ژوبله اوښتې ده.
ځايي امنيتي سرچينې وايي، د یاد مرکز د نيولو پر مهال طالبانو ځانګړی تکتیک کارولی او هغه داسې چې لومړی يې دغه مرکز ته د ځمکې لاندې تونل ايستلی او بيا يې چاودنه ورکړې.
د سرچينې په وينا، په چاودنه او بریدونو کې شاوخوا شل تنه عسکرو ته مرګ ژوبله اوښتې او د یادې قرارګاه له پرسونل سره اړيکې پرې شوي دي.
طالب وياند هم په یاده ولسوالۍ کې د یوې پوځي قرارګاه د نيولو خبر ورکړی زياتوي په چرخکيانو مانده سیمه کې لومړی د ميوند قول اردو د دوهمې لوا پر کنډک لومړی په ځمکه کې د تونل ايستنې په مرسته چاودنه شوې او وروسته پرې وسله وال بريدونه شوي.
د ښاغلي احمدي په وينا، په دغه بريدونو او چاودنه کې شپږويشت عسکر وژل شوي، د هغوی یوولس ميله وسلې طالبانو ته په لاس ورغلي او قرارګاه هم طالبانو نيولې ده.
تر اوسه د هلمند ولايتي چارواکو په دې اړه په رسمي توګه څه نه دي ويلي خو د امنيې قوماندانۍ یوې سرچینې د طالبانو بريدونه تاييد کړي چې په وينا يې عسکرو ته يې تلفات اړولي دي.
