(کابل ټکی کام، ۱۳۹۸ مرغومی ۷، شنبه)
د پکتیا ولايت په زرمت ولسوالۍ کې طالبانو د ګډو ځواکونو پر پوځي کاروان بريدونه کړي چې په وينا يې دوه امريکايي عسکر پکې وژل شوي دي.
ځايي سرچينې او طالبان وايي، ګډو ځواکونو غوښتل چې زرمت ولسوالۍ کې عمليات وکړي خو د یادې ولسوالۍ مربوط په غني خيلو او پاټو سيمو کې د طالبانو تر سختو بريدونو لاندې راغلي دي.
طالب وياند ذبیح الله مجاهد په خپله رسمي ټويټر پاڼه ليکي، په دغه بريدونو کې دوه امريکايي او دوه د کمپاين عسکر وژل شوي، یو ټپي دی.
د ښاغلي مجاهد په وينا، (تیره ورځ د پکتیا ولایت زرمت ولسوالۍاړوند غني خیلو او پاتوګۍ سیمو کې د امریکایي اشغالګرو او ضربتیانو په نوم داخلي غلامانو په ګډ عملیاتي قطار بریدونه وشول. د بریدونو په نتیجه کې ۲ امریکایي او ۲ ضربتي عسکر ووژل شول، یو بل ژوبل شو. مجاهدینو ته زیان نه دی رسیدلی).
د پکتيا سيمه ييزې امنیتي سرچينې تاييدوي چې په ياده سيمه کې د طالبانو د بريدونو په ترڅ کې ګډو ځواکونو تلفات اوښتي خو په دقيقه توګه يې د تلفاتو شمير نه دی په ډاګه کړی.
تيره ورځ هم هم ادعا کړې وه چې د کندز په بزکندهاري سيمه کې يې د ګډو ځواکونو په قطار چاودنې کړي چې په ترڅ کې يې دوه امريکايي عسکر ووژل شول او ګڼ نور ټپيان شول.
وخت ناوخت د طالبانو په وسله والو بریدونو، چاودنو او شپنيو عملياتو کې بهرنيو ځواکونو ته مرګ ژوبله اوړي خو بهرنيان يې د خپلې پاليسې له مخې دغه تلفات نه رسنيز کوي او یا يې ډير کم اعلانوي.
