راپور تاژ: عقاب افغان الحنفي
وروسته تر هغه چې غربي ژورنالستانو او رسنیو د ځینې مبهمو سرچینو له قوله د اوربند او په دې موضوع د طالبانو له داخلي اختلافاتو راپور ورکړ؛ طالبانو او ملاتړو یې توند غبرګونونه وښودل.
د دې ډلې ویاند ذبیح الله مجاهد نن په یوه اعلامیه کې وویل، ځينې مغرضې استخباراتي کړۍ د رسنیو په مټ هڅه کوي چې روانه مذاکراتي پروسه د تشویشونو، بې ځایه خوشباوریو او کاذبو معلوماتو خپرولو په مټ سبوتاژ کړي.
ده د رسنیو راپورونو ته په اشارې زیاته کړه، رسنیو خپل پروپاګند تر دې کچې هم رسولی چې د اوربند په مسئله د اسلامي امارت په دننه کې د اختلافاتو درواغجن افواهات تبلیغوي.
مجاهد ویلي، امریکایانو د جګړې د هجم او د عملیاتو د کمښت غوښتنه کړې، چې د اسلامي امارت په جهت کې په همدې مشخصه مسئله مشورې روانې دي، د اوربند موضوع بیخي مطرح شوې نه ده.
د نوموړي له غبرګون وروسته پر خواله رسنیو، ټوېټر، فیس بک، انسټاګرام او واټساپ د طالبانو ملاتړو لیکوالانو د (اوربند
او د رسنيورسوايۍ) تر عنوان لاندې لیکنې کړي، او رسنۍ یې دغربي اشغال سترګې یادې کړي دي.
دوی دخپل کمپاین په اوږدو کې ګڼ داسې اسناد هم ښکاره کړي چې یوه پیښه کې مخکښو رسنیو مختلف او له افواهاتو ډک مطالب رسنیز کړي دي.
د طالبانو ملاتړو رسنیو ته په خطاب کې ویلي چې نور باید خپل مسلک ته په احترام د پیښو حقیقي څیره ملت ته وړاندې کړي، نۀ منافقانه او زهرجن تبلیغات.
دوی تر ډیره له خپلو نظامي قومندانانو غوښتي چې رسنۍ بې طرفۍ ته راوګرځوي، که چیرته دوی داسې ونه کړي؛ باید پر وړاندې یې پرېکنده نظامي اقدام وشي.
طالبان په ټولنیزو رسنیو کې د واحدې قوماندې له لارې مختلف موضوعات څیړي او په اړه یې ملت ته هر اړخیز وضاحت ورکوي، داهغه څه دي چې څه موده وړاندې ځینې امریکایي رسنیو هم په فرهنګي ډګر کې د طالبانو په تبلیغاتي پیاوړتیا اعتراف کړی وو.
