کابل ټکی کام (یکشنبه، ۱۵ غبرګولی، ۱۴۰۱ل)
له اوکرایین ورکړل شوي راپورونه وایي، چې له څو اونیو ارامۍ وروسته په پلازمينه کيېف کې درنې چاودنې شوې دي.
د اوکرایین دولتي تلویزیون خبر ورکړی، چې چاودنې د پلازمینې په دوو بېلا بېلو سیمو کې شوې او له کبله يې تر دې مهاله يوازې د يوه کس د ټپي کيدو معلومات خپاره شوي دي.
که څه هم تر اوسه د چاودنو د څرنګوالي په اړه کره معلومات نه دي خپاره شوي خو په کيېف کې له تېرو څو اونيو راهيسې د روسیې د هوایي بريدونو د ګواښ زنګونه کړنګول کېدل.
دا په داسې حال کې ده؛ چې روسيې یوځل تېره مياشت هڅه وکړه چې پر دې ښار ولکه ټينګه کړي خو د اوکرايني پوځيانو له سخت مقاومت وروسته يې د خپلو پوځيانو ته د شاتګ امر وکړ، دا مهال په لوهانسک ایالت کې د دواړو لورو تر منځ خونړۍ جګړه روانه ده او د یاد ایالت ډیره برخه د روسي ځواکونو لاسونو ته لوېدلې ده.
